20. новебра 2009 о 16.30 год. у выставній салї Містьского центра културы в Гуменнім буде отворена фотоґрафічна выставка „Поезія в містї – ПАРА НЕПАРА“. Вісем знамых гуменьскых фотоґрафів выбрало сі окрему творчость восьмох реґіоналных поетів і вытворило ку ній фотоґрафічны ілустрації.
Авторы поезії: Мартіна Мілёвчікова, Даньєла Капралёва (Русинка), Мірослав Ціна, Мартін Дубас, Штефан Балаж, Петер Карля, Марош Андрейчік і Йозеф Дзуряк.
Авторы фотоґрафій: Мартін Демян, Роберт Ремень, Михал Вадїла (Русин), Даньєла Капралёва, Осиф Лауруськый (Русин), Богуш Табак, Людо Грушка і Любо Марко.
Вольнї іншталованых 40 чорно-білых і фаребных фотоґрафій, 50 віршів і простор заповненый добров музиков прозраджують духовный зажыток. Кураторков выставкы є ПаедДр. Даньёла Капралёва. Главным орґанізатором є Выгорлатьска книжніцю а сполуаорґанізаторами Містьскый центер културы і Основна умелецька школа в Гуменнім. Выставку мож попозерати до кінця рока 2009.
Пятый річник септембровой і новембровой Поезії в містї ся несе в дусї поезії, фотоґрафії і музикы. 14. септембра 2009 была перша часть той акції, в котрій 33 выступаючіх вєдно з орґанізаторами приправили інтересне декламаторьске пасмо, візуалны ефекты, спів і музику на пішій зонї в рамках Дня міста Гуменне. На акції, окрем знамых словеньскых поетів, презентовала ся і творчость гуменьскых поетів, вітязів Літератрурных талентів 2009, як і знамых реґіоналных авторів поезії. Режію того літературно-музичного пасма приправила ПгДр. Ева Яцевічова.
Цїлї проєкту: публічно презентоватовати властну, жыву културу міста; мотівовати літературну, музичну і вытварну сцену в містї; дати можность авторам конфронтовати свою творчость; вказати, же в тій гектічній добі є важне собі найти час про уменя, бо естетічне чутя култівує чоловіка і гармонізує ёго особность і под.