18. авґуста 2009 нюйорьска ґелерія Веред продала Портрет Майкла Дзексона од Енді Варгола, але затля не хоче опубліковати ёго продажну ціну ани купця. Скоро про вшыткых ґалерістів і теоретіків уменя тот портрет значіть споїня двох світовых ґіґантів уменя – краля попу і краля поп-арту, што в будучности наісто ся так скоро не повторить. Енді Варгол вытворив серію портретів Майкла Джексона в роцї 1984 на жадость маґазіну Таймс, котрый на своїй обалцї опубліковав Джексона видженого очами Варгола на вершынї карьєр обох умелцїв. Портрет Джексона до авкції дав пріватный збератель, котрого мено тыж зістає таёмством. Маїтелька ґалерії Веред Жанет Лер по скінчіню авкції не хотїла прозрадити конечну понукнуту суму, але підкреслила, же выразно пересягла выволаваючу суму 800.000 америцькых доларів.