Недїльне пообідя 13. януара 2013 р. было про православных віруючіх у Кошіцях барз святочне. В тот день ся уж в новім Катедралнім православнім храмі Успенія Пресвятой Богородицї першыраз зышло велике чісло людей на концертї під назвов Православне Рождество у Кошіцях. Тот концерт Православна парохія у Кошыцях орґганізує про своїх віруючiх (ку православію у тій парохії ся голосить коло 4 000 людей) на закінчіня рождественных свят уж другый раз. Ґарантом концерту уж традічно є хор Катедралного храму на челі з діріґентков хору і режісерков концерту Мґр. Славков Ксеніёв Рудачковов, ПгД

. В проґрамі выступовали окрем домашнёго Хору катедралного храму і призваны гостї. Літурґічный хор св. великомученицї Варвaры Православной парохії в Словінках є молодым хором заложеным недавно з ініціатівы молодых людей. Хор співать по церьковнославяньскы на Божественных літурґіях і іншых церьковных обрядах. Хор діріґує Надежда Січакова. Подля потребы заступують в діріґованю хору В. Міжіґанова і А. Качмарёва.

Мужска співацька ґрупа ПОЛЯНА взникла в 1996 року при Реґіоналній радї ЗРУСР у Кошіцях. Є барз добрї знама, бо часто выступать на фестівалах і іншых културных акціях у Свіднику, на Маковицькій струнї у Бардеёві, в Міковій, Камюнцї, Рускій Порубі, Розгановцях, Радванї над Лабірцём, на Лемківскій ватрї в Ждынї і інде. В ґрупі співають і трёме членове хору катедралного храму. Ґрупу збогачує прекрасным співом і допроводным словом МУДр. Марія Побегова. Ведучім ґрупы є Ярослав Дірґа.

Хор Катедралного храму Успенія Пресвятой Богородицї в Кошіцях з благословенієм Мітр. прот. Проф. ТґДр. Імріха Белейканіча, к. н., настоятеля Катедралного храму і справцю парохії, быв зыложеный в 2007 роцї. В ёго репертоарї на Божественных літурґіях суть піснї од такых великанів класічной музыкы, як П. І. Чайковскый, А. А. Арханґельскый, В. А. Моцарт і іншы. Ёго піснї было чути на фестівалах духовных пісень у Свіднику, співав на Мораві і на Ціпрї. Діріґентков хору є Мґр. Славка Ксенія Рудачкова, ПгД.

Мґр. Іріна Мацкова, членка хору катедрално храму, співать на концертах у допроводї своёй ґітары. Многы піснїі сі компонує сама. Любить співати лірічны піснї. Концерт зачав подля нетрадічного сценаря. Двоми пастушкове, Кубко з Матьком зо свічками в руках голосять вшыткым людям народжіня во Віфлеємі нашого Спасителя. По них хор катедралнохо храму під діріґуванём Мґр. Славкы Ксенії Рудачковой, ПгД. зачінать співати тропарь „РождествоТвоє Хрісте Боже наш“. Добра акустіка в храмі і мелодічный спів хору іщі веце зміцнёвала ріствяну атмосферу, од котрой вшыткым віруючім в храмі было барз легко нелем на сердцю, но они одчували велику полеготу і на свої душі.

Потiм модераторка концерту Стефанія Левканічова по вступнім слові позывала перед публiку далшых гостiв. Літурґічный хор із Словінок заспівав найзнамішы ріствяны колядкы: Добрый вечур тобі..., Дивная новина ,В Віфлеємі новина.. і Нова радость стала... Тота послїдня колядка в добрій акустицї храму так прекрасно звучала, же публіка тихым голосом тоту клядку співала вєдно з хором. По довгых аплавзах модераторка привела перед публіку оголосити новину о народжіню Спасителя мужску співацьку ґрупу ПОЛЯНА. Звучны голосы ПОЛЯНЫ із Кошыць при співі колядок нас в думках завели на село і припоминали нам даколишнїх колядників-парібків, котры на Святый вечур ходили по селї і співали під окнами колядкы. На вытворїня ріствяной атмосферы і доброй атмосферы нам заспівали тоты колядкы: Во странї юдейской.., Ангельскым гласом.., Во Віфлеємі засяла зоря і Родив ся Хрістос... Їх спів притомны в храмі одмінили довгым аплавзом. В соло співі на концертї выступила Мґр. Іріна Мацкова. Нам знамы і мало знамы ріствяны колядкы у своїм допроводї на ґітарї в тихім храмі нам звучали так, як бы їх співали ангелы з небес. Послїдню пісню к Новому року скомпоновала сама і співала ю по руськы. Віруючі в храмі тот єй спів оцїнили довгым аплавзом.

Модераторка іщі раз привела перед віруючіх хор катедралного храму заспівати пять знамых колядок, котры тихым голосом вєдно з хором співали і вшыткы віруючі в храмі. По доспіваню колядок перед хор ся зась вернули двоме пастушкове – Кубко і Матькo і просили Всевышнёго о благословіня до наступного нового року на охрану православных хрістіанів і довгый жывот в добрім здоровлю на многая і благая лїта. Вєдно з хором вшыткы в храмі постоячкы заспівали пісню Многая і благая лїта. З послїдным словом на концертї выступив священослужитель парохії прот. Мґр. Владимір Спішак. Він в першым рядї подяковав Господу Богу за поміч при будованю того прекрасного храму, в котрім мы першыраз праздновали Рождество Ісуса Хріста. Подяковав ся вшыткым, котры го будовали, помагали матеріално, фінанчныма дарами, або інакше. Подякованя належало тыж выступаючім і орґанізаторам того уж традічного концерту, орґанізованого на завершіня рождественных свят.

По закінчіню акції было про орґанізаторів, выступаючіх і позваных гостїв приготовлене мале погощіня. При дружнїй бесїдї, де было чути говорити по словеньскы, по україньскы, але найвеце по русиньскы, ся вшыткы згодли на тім, же такы стрічі помагають нашым людям усвідомлёвати собі нелем свою реліґійну, но і народностну ідентічность.