Зачатком фебруара 2011 Русиньска оброда на Словеньску в Пряшові была гостителём найвысшых представителїв Матицї словеньской (МС).
Тадь як є знаме, історічны судьбы словеньского і русиньского народів на выходнім Словеньску нелем близкы, aле в прінціпі і єднакы. Словаци і Русины жыли все в сусїнстві, в близкім і братьскім одношіню, як і в сполуналежности. Знаме є то, же і сниньскы будителї стоюли при зродї Народного проґраму Матицї словеньской в роцї 1863. В духу высше уведженых фактів стрїча проходила в приєній атмосферї а на нїй взяли участь за МС Йозеф Ткач – председа МС, Мґр. Ян Ешток – справця МС і ПгДр. Ладїслав Матіско – крайскый председа МС в Пряшові. РОС заступали: Владимір Противняк – председа РОС, Мґр. Мірослав Кереканіч і Бц. Сілвія Лысынова – члены ВВ РОС. Tоты участници продіскутовали много інтересного о взаємній сполупрацї. Найвысшы представителї обговорили і вопрос можности взнику Дому словеньско-русиньской взаємности, котрый бы быв у Пряшові або Гуменнім і в котрім бы мали застрїшіня обидві орґанізації, што бы іщі веце зєдиняло Русинів і Словаків. Говорило ся і о будучіх сполочных акціях, міджі основны буде належати масова подія День словеньско-русиньской взаємности – проєкт у рамках 10. Фолклорного Пряшова.