11. децембра 2009 в арт-кафе Музею модерного уменя Енді Варгола в Міджілабірцях ся одбыла презентація найновшой книжкы Штефана Смолея Нагода або судьба, котру приправила редакція Русин і Народны новинкы у сполупрацї з даным музеём, Сполочностёв Енді Варгола і Сполком русиньскых писателїв Словеньска. Притомных на презентації привітала домашня панї, директорка музею, ПаедДр. В. Мадярова, потім уж модераторьске слово дістав шефредактор Русина і Народных новинок, Мґр. А. Зозуляк, котрый говорив о діятельности редакції, творчости автора, а дотулив ся і темы списованя людей у 2011 роцї. Дале асістентка Інштітуту русиньскопго языка і културы Пряшівской універзіты, Мґр. А. Блыхова прочітала рецензію на презентовану книжку. Слово, самособов, было дане і авторови з Міджілаборець, котрый росповів о своїм творчім снажіню, а потім ся роспрудила бісїда притомных з автором. На кінцїі выдареной акції было роздаваня книжок і автоґраміада.