14. фебруара 2011 в засїдалнї ректора Пряшівской універзіты (ПУ) в Пряшові Словеньска асоціація русиньскых орґанізацій (конкретно єй членьскы орґанізації: Русин і Народны новинкы, Академія русиньской културы в СР, Сполок русиньскых писателїв Словеньска) і Інштітут русиньского языка і културы ПУ приправили Святочну презентацію публікацій у русиньскім языку выданых у роцї 2010 споєну з передаванём цїн Літературного конкурзу СРПС у 2010 роцї.
На зачаткы святкову атмосферу акції навіяв спів нашой популарной інтерпреткы русиньскых народных співанок Марії Мачошковой в допроводї гры на акордеонї Йозефа Пірога. Потім директорка Інштітуту доц. ПгДр. Анна Плїшкова, ПгД., привітала притомных (было їх высше 50), отворила презентацію і обознамила гостїв із єй проґрамом. Представила єдночасно 2 публікації, котры были выданы у 2010 роцї Інштітутом русиньского языка і културы ПУ в Пряшові. З приговором тыж выступив шефредактор Русина і Народных новинок Мґр. Александер Зозуляк. Тот представив учебникы і книжкы выданы редакціёв Русин і Народны новинкы і Академніёв русиньской културы в СР. Своє вступне слово повіла і председкыня СРПС ПгДр. Кветослава Копорова.

Потім были прочітаны рецензії на выданы публікації і представены їх авторы. Як перша выступила із рецензіов на зборник поезії про дїтей і дорослых І Янкови, і нянькови од Іветы Мелнічаковой Мґр. Івана Джундова, ПгД. Другу рецензію прочітала ПгДр. Марта Бенькова, ПгД. Была то реценрзія на двойязычну книжочку баёк Миколая Ксеняка од доц. ПгДр. Петра Кашы, ПгД. – Зеркадлїня. Далшов была рецензія доц. ПгДр. Петра Кашы, ПгД., котру прочітала Івана Джундова, а то на книжку Юрка Харитуна – Мої жалї. Рецензію на научно-попюуларну пулікацію історічного характеру – Ґрекокатолицькый священицькый род Павловічовых із Шарішского Чорного (1693 – 1900) од Рудолфа Павловіча прочітав ПгДр. Михал Мурцко, к. н. ПгДр. Кветославы Копоровой прочітала рецензію на книжку Думкы і тужбы авторкы Кветы Мороховічовій-Цвик. Далшов была рецензія зоставителькы доц. ПгДр. Анны Плїшковой, ПгД., на зборник творів, котры были опублікованы в роках 1995 – 2000 в літературнім додатку Народных новинкой Поздравлїня Русинів а зборник ся зве Русиньскы соловї. Послїднёв было представлїня Русиньского літературного алманаху на 2010-ый рік ёго зоставителём Мґр. Александром Зозуляком. В далшій части презентації ся ку своїм найновшым книжкам і творчости высловили самотны притомны авторы.
Частёв святочного дня было переданя цїн Літературного конкурзу СРПС у 2010 роцї. Оціненыма были: Юрко Харитун, котрый здобыв 1. місце, на 2. містї скінчіли двоє авторы із красныма творами: Квета Мороховічова-Цвик і Осиф Кудзей, третїй быв молодый автор – Петро Ялч. По переданю цїн было роздаваня книжок, якы сі участници акції могли дати підписати авторами і зоставителями.