28. юна 2010 у резіденції Православной церькви на Словеньску на ул. Будовательскій у Пряшові архієпіскоп пряшівскый і Словеньска, Ян (Голоніч) прияв професора Торонтьской універзіты і презідента Карпаторусиньского научного центра в США, Др. Павла Роберта Маґочія, директорку Інштітуту русиньского языка і културы Пряшівской універзіты, доц. ПгДр. Анну Плїшкову, ПгД., і шефредактора Русина і Народных новинок, Мґр. Александра Зозуляка.

Неформална діскузія ся вела на тему вжываня русиньского языка в пасторації і літурґії православной церькви, в єй офіціалных выданях, в процесї формованя теолоґів богословецькой факулты, т. є. будучіх священиків, якых пасторація ся вяже переважно з русиньсков громадов, і под. Архієпіскоп Ян з великов почливостёв прияв цїнный дар од проф. Маґочія – Тетраєвангеліє в русиньскім языку, яке собі нашло честне місце в ёго резіденції. Ці таке саме місце буде даколи мати в пасторації православной церькви, то укаже будучность...