16. януаря 2011 в кінї Скала в Пряшові одбыв ся Новорічный ґалаконцерт Рутеніка, на зачатку якого до душ притомных проговорили модераторы С. Зелінкова і В. Чема, кідь окрем іншого завінчовали: „Вінчую, вінчую молодым і старым, бы ся рады мали, а в тім новім роцї при списованю людей за Русимнів ся записали...“
У богатім културнім проґрамі выступили главно лавреатів дотеперїшнїх річників цїлословеньского конкурзу: тріо Маґуровых, М. Чабак, дуо М. Караш а І. Сивулькова, дуо Я. Чура і П. Феценко, співачкы М. Железна, С. Качмарова і Н. Сікорякова. Проґрам добрї збогатила ДФҐ Хемлонячік із Гуменного з русиньскыма танцями Цеперька або Танцовачка у хореоґрафії директора ПУЛЬС-у В. Марушина або колядници з МСҐ Гачуры, в котрій суть хлопи з Птічого, Брекова, Удавского і Гуменного і Народна музика Соколей із Гуменного з прімашков В. Бегунёвов. З богатым і красным проґрамом были спокійны нелем домашнї, але і загранічны гостї: М. Фейса, Б. Бєлович, М. Бобинець. Концерт приправила Русиньска оброда на Словеньску в сполупрацї з Містнов орґанізаціо РОС у Пряшові.