23. януара 2010 у русиньскім селї Руськый Керестур, в области Войводина (Сербія) одбыли ся традіцічны прядкы, котры все орґанізує сіндікат Основной школы і ґімназії Петра Кузмяка.
В рамках прядок быв і міджінародный бал, на котрім міджі коло 150 навщівителями были главно педаґоґічны і іншы працовници і пензіонарї школы, але і позваны гостї з русиньского села Міклошевцї у Хорватьску, як і Мґр. Валерій Падяк, к. н. із Ужгороду (Україна). Миклошевчане, аматеры културно-умелецького колектіву Якіма Ґовлю на прядках у школї ся забавляли з домашнїма по своїм ціловечурнім концертї в домі културы. На прядках В. Падяк передав директорови школы Янкови Хомови цінный дарунок про школу, яка несе мено П. Кузмяка, а то ёго портрет зо серії 100 вызначных Русинів од Народного умелця Україны, Василя Скакандія з Ужгороду. Прядкы ся скінчіли балом, де были і різны лакоцінкы і традічны їдла, котры приправили кухаркы школы, міджі нима і три сорты мачанкы: капустова, парадічкова і біла.