19. септембра 2009 у ґоралскім містечку Спішска Стара Вес одбыв ся Фестівал русиньской културы, котрый у рамках проєкту Стріча семох култур словеньско-польского приграніча зорґанізовало місто Спішска Стара Вес і Здружіня Еврореґіон Татры.
Фестіоваловый проґрам зачав презентаціов русиньской кухнї і богатов маніфестаціов містом фоклорных колектівів у прекрасных народных кроях. А потім уж на сценї під голым небом зачав културный проґрам, у котрім выступили русиньскы колектівы з польско-словеньского приграніча в области Лемковины: ФК Барвінок з Камюнкы, ФҐ Ястрабчан зо Шарішского Ястрабя, ФК Ручай і ДК Веретено з Ґорліць, співацьке дуо Івана Сивулькова і Мартін Караш з Камюнкы, єдна з найлїпшых лемківскых співачок – Юлія Досна, декламаторы русиньской поезії Миколай Коневал із Камюнкы і Анна Тужакова з Остурнї, молоды таленты з Камюнкы, Шарішского Ястрабя і Остурнї, як і домашнїй танечный колектів Маґурка. В дінамічнім тройгодиновім проґрамі в режії Мартіна Караша з Камюнкы выступаючі презентовали традіції Русинів, котры жыють в пригранічній области Словеньска і Польска. Богату презентацію русиньской културы завершыло выступлїня нашого популарного професіоналного ансамблю ПУЛС з Пряшова своїм доконало приправленым красным проґрамом.
Главным цілём орґанізаторів фестівалу є охрана і пропаґація културного богатства традіцій міноріт польско-словеньского приграніча. А што ся тыкать русиньской меншыны в тій примаґурьскій области, так мож сміло повісти, же ся їх ціль сповнив.