Научна рада Пряшівской універзіты (ПУ) в Пряшові на своїм засїданю 10. децембра 2012 на основі пропозіції Інштітуту русиньского языка і културы ПУ продіскутовала Пропозіцію на удїляня честного тітулу „doctor honoris causa“ у одборї Історія професорови Торонтьско універзіты Др. Павлови Робертови Маґочіёви.

Тот тітул удїлює Научна рада ПУ вызнамным домашнїм і загранічным особностям, котры ся значно вызнамным способом заслужыли о розвой демокрації і уменя, а выслїдкы їх діятельства мають окремый вызнам і резонанцію в Словеньскій републіцї і за ёй гераніцями. 3. децембра 2012 тот тітул із рук ректора ПУ проф. РНДр. Рене Матловіча, ПгД., перевзяв проф. културной антрополоґії на Томпсонoвій універзітїі в Кемлупс в Канадї – Дейвід З. Шеффел. Святочный акт переданя честного тітулу проф. П. Р. Маґочіёви буде на святочнім засїданю Научной рады ПУ в юни 2013. В тім часї проф. Маґочій навщівить Словеньско і Пряшівску універзіту як учітель історії карпатьскых Русинів на 4. річнику Міджінародной лїтнёй школы русиньского языка і културы –Studium Carpato-Ruthenorum 2013, што беспорно приспіє к зміцнїню вагы того міджінародного освітнёго проєкту, орґанізатором котрого є Інштітут русиньского языка і културы (ІРЯК) ПУ в Пряшові. Тот акт удїлїня честного тітулу проф. Маґочіёви почас споминаной лїтнёй школы таксамо можеме розуміти як оцїнїня дотеперїшнёго діятельства ІРЯК, але главно як принос оцїненого професора к розвою історії вобщім, але і історії карпатьскых Русинів окремо, як і розвитку карпаторусиньскых штудій в словеньскім і міджінароднім контекстї.