Під таков назвов у русиньскім селї Убля, Сниньского окресу, 10. і 11. авґуста 2013 ся одбыв 23. річник културных славностей у тім селї. На роздїл од попереднїх річників теперь были славности іщі святочнїшы, як по минулы рокы, бо были реалізованы з нагоды 670-річа од першого писемного запису о селї.

Што спомянути з той причіных? Главно то, же першый день у салї зрекоштруованого дому културы было спочатку славностне верейне засїданя сільского заступительства, почас котрого были переданы памятны плакеты веце як стовцї жытелям, родакам і особностям, котры приспіли з розвою села. Потім наслїдовав концерт мужского співацького колектіву Русінія з Гуменного, котрый спершу збогатив проґрам у домі културы, а нескорше у прикрашенім просторїі перед домом културы. Културный проґрам быв барз богатый, тадь в рамках фестівалу выступило высше 300 выступаючіх з нашой отчізны і поза єй граніцї. Самособов, же в тім проґрамі не могла хыбовати домашня Ублянчанка, яка потїшыла сердця вшыткых притомных зо своїм інтересным проґрамом. Мож бы говорити много позітівного о тім фестивалї, але не мож ся заспокоїти з тым, же при ёго орґанізаваню ся анґажують попри домашнїх Русинів зо сільского уряду тыж праєдставителї україньскых орґанізацій і інштітуцій. Так тому было, же за співорґанізатора выступив перед вшыткыма (быв там притомный і председа Пряшівского самосправного краю Петро Худік) председа Реґіоналной рады „Союзу Русинів-Українців Словацької республіки“ (СРУСР)в Гуменнім Михал Іванчо, але і председнічка „Світової федерації українських лемківських орґанізацій“ Софія Федина, як і председа ЗРУСР Петро Сокол. Село русиньске, люде в нім векшынов Русины, проґрам векшынов русиньскый, але де є даяка русиньска орґанізація, або даякый з їх сучасных актівітів?! ... Тыж Русиньскы оброда на Словеньску могла бы быти сполуорґанізтатором, чом бы нїт?! Тадь в Ублї при послїднїм списованю людей к Русинам ся приголосило 223 жытелїв, а к Українцям лем 60 людей! І так потім на вшыткім русиньскім дале паразітують Українцї, респ. Русины україньской орьєнтації, Так є то правилно, так є то добрї?! Также, роде наш красный русиньскый, анґажуй ся веце і в русиньскій Ублї.