27. новембра 2009 у просторах Народной бібліотекы і чіталнї Данила Кіша у Вербасї (Сербія) была презентація збіркы поезії Александра Деветака під назвом „Тайновити места“ (Таємны місця). Рецензентами книжкы суть Небойша Деветак і проф. Др Михал Фейса, выдавателём Выдавательскый дом Прометей у Новім Садї і Културно-освітне дружство Дому културы (КОД ДК) у Коцурї.
Два днї пізнїше, 29. новембра в Домі културы в Коцурї Културно-освітне дружтво ДК зорґанізовало округлый стіл на тему Вольбы до Народной рады русиньской народностной меншыны. На 5. децембра приправены два турнаї в рамках Шпортовых гер Яша Бакова – турнай у шаху участників до 15 років і турнай у шмаряню шіпок без огляду на вік участників. Турнаї ся одбудуть в просторах Основной школы Братства-єдинства в Коцурї а їх орґанізатором є Шаховый клуб „Омладинєц“ (Молодежник) і КОД ДК. 8. децембра в Клубі Выдавательского дому Прометей у Новім Садї быде презентація другого тому репрезентатівного зборника робот Русини/Руснаци/Ruthenians (1745 – 2005) главного редактора проф. Др Михала Фейсы. Рецензентами зборника суть: проф. Др Александер Дуліченко з Естонії, проф. Др Любивоє Церовіч і Др о. Боріс Холошняй із Австрії а видавателём „ИК Прометей“, Філозофічна факулта – Оддїлїня русиністікы і КОД ДК.