26. – 27. септембра 2009 на челї з професором русиньского языка і літературы на Універзітї в Новім Садї – Михалом Фейсом навщівила Словеньско сімнадцятьчленны делеґація Русинів із Коцура і Руського Керестура на Войводинї в Сербії.
Про тоту делеґацію быв приправеный богатый проґрам, котрый зачав у Пряшові навщівов центра Русиньской оброды на Словеньску, наслїдно попозеранём експозіції Музею Пряшівской ґрекокатолицькой єпархії з одборным выкладом віцеканцеларя Пряшівского архієпіскопского уряду, о. ПаедДр. Ф. Данцака, потім продовжовав навщівов русиниьского села Хмелёва (окрес Бардеёв), де проходив концерт фестівалу Співы мого роду, на котрім собі заспівали і гостї зо Сербії. Далшый день зачав ся екскурзіёв по історічнім центрї Бардеёва а потім ся делеґація перемістнила до Міджілаборець, де навщівила знамый Музей модерного уменя Енді Варгола, была на службі Божій у містній православній церькви, прошла ся по мінісканзенї русиньской архітектуры ітд. На конець не хыбовала ани тіпічна русиньска гостина і выміна дарунків.
Было конштатовано вшыткыма притомныма, же такы стрічі суть барз потребны про утужованя єдноты і міджінародной сполупрацї Русинів, бо хоць сьме далеко од себа, наше сердце биє про єдно – РУСИНТВО.