Ку 21. маю 2011 на Словеньску буде списованя людей, квартелїв і домів. А при тій нагодї до того терміну будеме ся снажыть в каждім чіслї нашых інтернетовых новинок АКАДЕМІЯ РУСИНЬСКОЙ КУЛТУРЫ В СР приносити статї нашых дописователїв ку даній темі. Также ту є єдна з тых статей:
Дорогы чітателї, новодобый оброджуючій процес Русинів ся реалізує уж практічно веце як 20 років. Подля нашых одгадів выслїдкы тому не одповідають. Іщі дас 70% нашых людей є вагаючіх і іщі все ся не стотожнюють з русиньсков ідентічностёв. Праві третє демократічне списованя людей ку 21. маю 2011, котре ся одбуде од 13. мая до 6. юна 2011, нам укаже зеркало нашого діятельства у возроднім процесї Русинів на Словеньску.
Списованя належать міджі найвызнамнїшы і найрозсяглїшы штатістічны інформації, котры ся традічно реалізують в десятьрічных інтервалах. В роцї 2011 ся списованя жытелїв одбуде у вшыткых членьскых штатах Европской унії нараз а буде такой частёв цїлосвітового проґраму Орґанізації споєных народів. Запоїти ся до списованя каждого з нас значіть помочі при вытворїню даных, окрем іншого, о соціалній, економічній і народностній штруктурї, котры суть потребны на коордінацію діятельства в штатї і при вытваряню приязнїшых условій у вшыткых областях жывота людей. Запоїти ся до списованя значіть охабити ґенераціям, котры придуть по нас справу о тім, якы сьме были і як сьме жыли мы, їх предкы. Тот важный крок ся ближыть і мали бы сьме быти на нёго добрї приправены. Про нас Русинів є спи.сованя барз вызнамный акт, бо ёго выслїдкы овпливнять будуче прямованя цїлкового діятельства русиньской народностной меншыны. Штатістічны даны о кількости жытелїв окремого етніка суть і все будуть вырішуючім арґументом про владу СР і далшы штатны орґаны і інштітуції при їх вырїшованю о різній підпорї і дотаціях заміряных главнї на утриманя і розвой школства, културных традіцій, языка і іншых потребных сфер русиньской міноріты на Словеньску. Коротко повіджено, чім веце нас буде, тым будуть нашы пожадавкы леґітімнїшы. А в непосліднім рядї є то наша морална повинность в одношіню ку своїм предкам, а заєдно з тым і одказ про будучі ґенерації Русинів. З цілём досягнути штонайлїпшы выслїдкы при тогорічнім списованю, ґрупа русиньскых актівістів вырїшыла перед тым важным кроком выпрацовати серію обычайных летаків, котрых заміром є припомянути каждому народностне усвідомлїня Русинів – їх право і повинность. А то главнї тым Русинам, котры іщі все вагають або десь блудять в чуджіх водах. Пропаґачныма летаками хочеме передати ідею ці одказ знамых русиньскых будителїв минулых сторіч днешнёму поколїню Русинів. Далшы летакы будуть присвячены сучасникам – обще знамым русиньскым особностям з різных областей културно-сполоченьского, научно-выскумного, політічного, христіаньского ці шпортового жывота на Словеньску і їх одказу про сучасну ґенерацію. В летаках будуть хоснованы публїкованы тексты русиньскых поетів. Затоже не маме на них контакт, не пожадали сьме о згоду на публїкованя їх творчости, но віриме, же істо бы не были проти нашому почіну, бо ту іде о добро нас вшыткых, о скоро послїдню можность ословити людей перед списованём людей у маю 2011.
Із згодов майстра Федора Віца будуть в летаках презентованы його карікатуры „до властных рядів“. Віриме, же тоты летакы ся достануть до рук вшыткых жытелїв русиньского реґіону, а то будь при громадных културных і сполоченьскых акціях, в особнім контактї, але надіяме ся, же будуть посыланы і через Словеньску пошту, а. с. Авторскый колектів такым способом хоче попросити вшыткы русиньскы орґанізації, жебы ся запоїли до той пропаґачной акції, розмножовали тоты летакы і доручовали їх у своїй околіцї. Авторскый колектів у зложіню: Ян Допіряк, Мартін Костілник, Анна Кузмякова і Федор Віцо – спрацовує летакы од їх пропозіцій, ґрафічной управы аж по приправу до друку. Думаме, же найефектівнїше є друковати летакы у форматї A5, респ. у форматї A4. Зато, жебы летакы собі могли перечітати і люде сучасной ґенерації, котры не знають азбуку, авторскый колектів вырїшыв друковати тексты в латиніцї, а то письмом, котре ся хоснує в часописї Артос і в Ґрекокатолицькых русиньскых календарях. Цілём є ословити штонайвеце нашых людей вшыткых ґенерацій.