17. октобра 2009 (субота) од 18.00 год. на великій сценї Театру Йонаша Заборьского у Пряшові представлять ся найлїпшы інтерпреты русиньскых народных співанок в допроводї Народной музикы Хемлон із Гуменного. Акція пройде в рамках найвекшого і найпопуларнїшого цілословеньского проєкту Русиньской оброды на Словеньску – Співы мого роду.
Частёв 8. річника фестівалу русиньской народной співанкы буде выголошіня Лавреата Співів мого роду за рік 2009. Выбір співаків на тоту уж традічну цілословеньску сутяж проходить формов реґіоналных кол, котры ся орґанізують главно на северовыходї Словеньска. Так одборна порота выберать найлїпшых русиньскых інтерпретів, котры дале поступують до цілословенського кола. Цілый конкурз ся складать з двох частей – про дїти і про дорослых. Подмінков участи є заспівати дві русиньскы народны співанкы з даного реґіону, причім орґанізатор давать перевагу автентічным або дотеперь іщі не награтым пісням.
Дїтьска часть сутяжи того року ся уж одбыла в Орлові, Якубянах (окрес Стара Любовня), наслїдно в селї Хмелёва (окрес Бардеёв), де на славностнім ґалаконцерї было і выголошіня лавреата той части конкурзу. Малов, але голосом великов, лавреатков ся стала талентована русиньска співачка Андрейка Соколякова з Камюнкы (окрес Стара Любовня).
Концерты дорослых іщі лем будуть: 15. октобра 2009 в Ґерлахові і Біловежі (окрес Бардейов), наслїдно на другый день (16. 10. 2009) будуть красны тоны русиньскых народных співанок звучати у Малім Липнику і Якубянах (окрес Стара Любовня), як і самій Старій Любовнї, де орґанізаторы приправують аж два выберовы кола споєны з концертами. Вершинов той цілословеньской сутяжи буде уж авізованый ґалаконцерт у Пряшові, де ся представлять тоты найлїпшы з найлїпшых. Частёв богатого проґраму буде і ексклузівне выступлїня популарного ПУЛЬС-у з Пряшова. Кідь любите русиньскый фолклор, автентічны русиньскы народны співанкы і оріґіналность Русинів, так наісто на концертї найдете то, што є вашому сердцю миле.
Вшыткы сьте витаны на концертах русиньскых народных співанок у Ґерлахові, Біловежі, Малім Липнику, Якубянах, Старій Любовни, як і на ґалаконцертї в Пряшові!