23. юла 2009 драматічный колектів русиньского професіоналного Театру Александра Духновіча (ТАД) в Пряшові в таліяньскім містї Чівідале дел Фріулі (в просторах єдной з містых церковлей) на міджінароднім театралнім фестівалї Маттелфест 2009 выступив із гров словеньского драматіка Карла Горака Ла Мусіка.
„Є то престіжна акція а наш театер ся на нїй із своёв творчостёв презентовав зась по десятёх роках. Орґанізаторам сьме понукли три гры а они собі выбрали Горакову Ла Мусіку, котру з нашыма герцями наштудовав у 2001 роцї режісер Растїслав Баллек,“ повів директор ТАД Маріан Марко. Іде о оріґіналну словеньску драму, котра на судьбі єдной родины захоплює події скоро цілого 20. стороча, враховано двох світовых воєн і періоду комуністічной тоталіты. Інтересным на тій грі є, же музика, котра є вообще поважована за средство полюдщованя сполочности, ся в тім припадї стає траґедіов цілой родины.
З гров герцї выступили в русиньскім языку і єй дія была допроводжована англіцькыма і таліяньскама текстами. В театралній грї выступили: Василь Русиняк, Людміла Лукачікова, Владиміра Брегова, Євґен Либезнюк і Любомір Міндош. Сцену вытворив Штефан Гудак а музику ку грї скомпоновав Норберт Боднар.