2. – 8. авґуста 2009 ся одбыв лїтнїй табор про русиньскы дїти нараз на двох місцях – у Хмелёвій, Бардеёвского окресу, і в прекрасній природї Червеного Клаштора, окрес Стара Любовня. О таборы є дость великый інтерес, зато тяжко было выбрати 20 дїтей, котры сі то найвеце заслужать. Але наконець были выбраны тоты, котры уж дашто зробили на културно-народностнім полю Русинів. Про дїти в таборї быв приправленый богатый проґрам, але ани они ся не дали заганьбити своїм културным проґрамом. Зато, же уж по третїй раз Русиньска оброда на Словеньскы приправила такый табор, патрить єй похвала, бо без молодого поколїня далше русиньске дїло пропаде.