Конець рока є часом біланцованя. Не мать значіня вертати ся к тому, што є за нами. Мы, котры слїдуєме русиньскый рух, знаме яка є сітуація Русинів на Словеньску, што нас заболїло і што потїшыло. Много ся о тім поговорило і пописало. Курте оцїнїня: словакізація продовжує, розвой русиньского школства стаґнує, позіція церьковных представителїв обидвох выходных церьквей к Русинам ся не мінить, літурґічны обряды ся дале словакізують, фінанцованя народностных актівностей вообще є недостаточне. Перейдуть тоты проблемы і до будучого 2012 року?! Правдоподобно гей, але будьме і оптімістами. Конечно ся дізнаме выслїдкы списованя людей і віриме, же будуть про нас Русинів позітівны. В залежности од того в бівшій мірї будеме мочі адресовати нашы жаданя владным інштітуціям, але і церькви. Но мусиме быти і самы к собі нарочнїшы і одповіднїшы. Народностна меншына, котрой члены ся отворено і сміло в бівшій кількости голосять к своїй народности, собі заслужать і мають підложено жадати дотримованя своїх народностных прав у сполочности подля світьскых, але ай Божых законів. Хвала Богу, же суть міджі нами актівісты, священици і поєдны люде, котры суть охотны ся анґажовати і робити на благо Русинів. У часї, кідь пишу тоты рядкы, стоїме перед вольбами нового председы Русиньской оброды на Словеньску. По выданю тых Народных новинок уж будеме знати ёго мено. Хто бы ним не быв, віриме, же буде робити на хосен далшого розвитку русиньского руху і буде ся снажыти реалізовати права Русинів і презентовати їх статус і проблемы в сполоченьскім контекстї СР, а то нелем на уровни културы, фолклору, але і путёв тых, якы в політічній лінії як членове окремых партій суть охотны ся анґажовати про свій народ, але і партій, котры мають і будуть мати у своїх проґрамах і вопрос народностной політікы. Зато бы сьме мали барз добрї слїдовати передволебну кампань і треба підпоровати тых, котры ся нас Русинів заставають і будуть нам охотны помагати. Про мене є і то в наступнім роцї доводом к оптімізму і надїї, к чому няй нам, вірным Русинам на Словеньску, помагать Господь Бог.