29. апріля 2011 члены Академічного сенату Пряшівской універзіты у Пряшові зволили проф. РНДр. Рене Матловіча, ПгД., за ректора універзіты на далшы штири рокы, кідь з 26 притомных за нёго голосовало 25 членів а єден ся стримав голосованя.
В рамках представлёваня себа як кандідата на ректора презентовав Р. Матловіч свою візію на новый функчный період. Выходить з розуміня посланя універзіты як віталного жрідла новых знань і іноватівного думаня, „продуцента“ компететных і мудрых абсолвентів, якы будуть схопны добрї ся реалізовати на торгу роботы, в подинканю або слободній професії, як передавателя діпломів з міджінароднов кредібілітов, як атрактора міджінародных талентів (штудентів і працовників). Універзіта в ёго розуміню бы мала представляти добре місце про штудованяї і роботу, быти каталізатором фінананчных івестіцій до подниканя з высоков міров вартости в містї і реґіонї, але і „стражцём“ академічных традіцій і цінностей нашой културной дїдовизны. Главный цїль універзіты видить Р. Матловіч главно в посилнїню єй схопности реаґовати на вокашнї імпулзы і внуторны потребы, досягнути довготривало розвой інштітуції. Ку ґратулантам староновому ректорови Р. Матловічови ся припоюють і члены Інштітуту русиньского языка і културы ПУ, і члены редакції Русина, Народных новинок і русиньской неперіодічной пресы.

-аз-