30. септембра 2010 одбыла ся перша часть (дїтьска) конкурзу Співы мого роду, а то пятёма концертами, котры русиньска дїтвора і молодеж абсолвовали в селах і містах, конкретно два у Свіднику і єден у Ладомировій (окрес Свідник). 1. октобра 2010 были далшы два концерты в Міджілабірцях, а в рамках єдного было і выголошіня лавреата той части, якым ся став Роланд Ґуба з Міджілаборець. Часть конкурзу дорослых інтерпретів русиньскых народных співанок ся зачала концертом 2. октобра 2010 у Пчолинім (окрес Снина), другый концерт быв у Снинї. 3. октобра 23010 быв третїй концерт (ґала) у Гуменнім, де была выголошена і лавреатка дорослой части 9. річника Співів мого роду – Наталія Сікорякова з Літмановой (окрес Стара Любовня). Тота наймасовіша акція Русиньской оброды на Словеньску мать міджінародный характер, што пітвердило того року выступлїня співачок А. і Г. Бучко з Хорватії. Так бы повісти отцём той акції є Мґр. Мірослав Кереканіч, якый нелем знать выглядати новы таленты, але і дале їх розвивати.