Не дасть мі іншак, лем зареаґовати на статї, котры публіковав єден із членів ОСРС, пан Мілан Семанчік.

Перша статя під назвов Проґрамовы тезы розвитку русиньского народа вышла на сайтї Голосы і на сайті інтернетовых новинок Академія русиньской културы Словацькой републікы. Пан Семанчік там пише свої погляды на то, што бы ся мало робити в русиньскім руцї і вызерать то так, як кібы тото были позіції ОСРС (позн. ред.: там є ясно повіджено, же то суть пропозiції М. Семанчіка і під нима є підписаный своїм меном і призвіском). Тото не є правда, бо то суть лем ёго погляды, о котрых сьме іщі абсолутно не говорили довєдна на ОСРС, і котры не мусиме прияти і так то зістане лем ёго думков. Уж раз єм напоминав членів мейлом, жебы не публіковали статї, котры ся будуть односити ку ОСРС. За ОСРС маю мандат публіковати статї я як говорця ОСРС, што было одголосовано на ОСРС. Пан Семанчік так уж по не знам котрый раз порушыв приятый договор і іґнорує ОСРС. І то в сітуації, коли до днешнього дня не дав приглашку о членьство а і напрік тому суть му дверї, так як каждому, на засїданя одкрыты.

Друга статя од пана Семанчіка є іщі стось гірше. На Голосах публіковав статю Русины бы хотіли уповномоченого з підпоров влады?, де атакує і членів ОСРС, же суть в ОСРС лем резултатом кабінетной політікы ... Навеце, підтримує там РОС і атакує нашых членів. Тото не є в порядку і пан Семанчік бы собі мав усвідомити, же наприклад мы верейно не атакуєме РОС, не знижуємє у верейности їх позіцію і все платить наша понука, жебы пришли за округлый стіл.

Хочу ку тому повісти лем тото. По перше, жадам председницьтво ОСРС, жебы ку тому дало своє выголошіня і тема была проїднана і на слїдуючім засїданю. По друге, покля пан Семанчік не хоче решпектовати правила і хоче атаковати ОСРС або ёго членів, потім є ёго партіціпація на ОСРС барз смутна. ОСРС є платформа, де собі можеме вшыткы дїла выдіскутовати і не натїгати ся по медіях. Точно така аґресівна політіка натїгованя і атакованя, котра нич не рїшала, была єднов із прічін, чом ОСРС выникнув. Вшытко ся дасть рїшати на нашых стрічах і не є добре, жебы хтось тягав тото по медіях. До медій хочеме дістати позітівны інформації о Русинах, не деякы контроверзны статї. Я так само не мушу быти согласный зо вшыткыма з ОСРС, але не дозволю собі то публіковати і уж цалком не з позіції члена ОСРС.
<
Статї:
http://www.holosy.sk/rusini-chceli-za-splnomocnenca-cloveka-s-podporou-vlady
http://www.holosy.sk/m%D1%96lan-semanch%D1%96k-5