22. юла 2009 в катедралнім храмі св. Яна Хрестителя в Пряшові было архієрейске одпустове свято на честь благореченого пряшівского єпіскопа-мученика, Русина – Павла Петра Ґойдіча. Архієрейску святу літурґію одслужыв пряшівскый архієпіскоп і митрополіта Ґрекокатолицькой церькви на Словакіїї, Монс. Ян Бабяк за участи емерітного пражского помічного єпіскопа Яна Еуґена Кочіша, протосінкела кошыцького єпіскопства Владиміра Томка і 50 далшых священиків. Катедралный храм быв повный путників нелем із Пряшова, але і з іншых парохій архієпархії. З голіміёв выступив ректор Ґрекокатолицькой богословской семінарії благореченопго П. П. Ґойдіча в Пряшові, Марко Роскош. „Треба в жывотї спознати, же Бог є любов. А в тім є нам барз добрым прикладом праві благореченый Павел Петро Ґойдіч, котрого жывот быв споєный з Божов любвов, што підкреслив і у своїм єпіскопскім геслї – Бог є любов, любме го,“ повів М. Роскош.
На кінци свята быв молебен ку благореченому П. П. Ґойдічови в капличцї при ёго тїлесных остатках. Приговорив ся і владыка Ян Бабяк, котрый підкреслив, жебы сьме ся з Божов помочов снажыли приподобнити к ёго жывоту, в якім знав одпущати і любити. Не тужыв по помстї, не одсуджовав і не судив іншых, быв покірным. То є путь і про нас, ёго обдивлятелїв.
Літурґію своїм співом спроваджав Катедралный хор св. Яна Хрестителя з Пряшова під веджінём Валерії Гріцововой.