16. і 17. октобра 2010 прошли в польскых Красній (місцї народжіня І. Русинека) літературна акція – 18. Лемківска творча осінь і културно-сполоченьска акція, одкрытя памятной ізбы Івана Русенка в просторах Стоварышіня Руська бурса в Ґорліцях, головным орґанізатором котрых было Стоварышіня Лемків на челї з А. Копчом, єдночасно підпредседом Світовой рады Русинів.
Треба спомянути, же недавно вышла інтересна книжка зоставителя П. Трохановского Русенко – Выбране, котры была приправлена з нагоды 120 років од дня народжіня і 50-річа од смерти вызначного лемківского будителя, І. Русинка і тота публікація была славностно „похрещена“ і представлена зоставителём за допроводу Др. О. Дуць-Файфер з Яґелоньской універзіты в Кракові. В ізбі ся находить много інтересного зо жывота І. Русенка: ёго портреты з різных часів, много автентічнх артефактів, выбір з ёго творчости, як і анотації різных публікацій. Суть там і цінны документы з часів, кідь Русенко быв выселеный на Україну, або ёго рукопис із року 1957, в якім передає одказ Лемкам, жебы ся старали о лемківску бісїду, котру треба зреформовати, встановити єднотны ґраматічны формы і правопис.
На Лемківскій творчій осени, окрем І. Русенкови, оддали честь і довгорічній участницї той акції, Лавреатцї Премії Александра Духновіча за русиньску літературу, писательцї з Пряшова (Словеньско) – Марії Мальцовскій, котра недавно одышла у вічность. Почливость дали і „желізній лейді“, як прозывають тутешнї Лемкы Олену Дуць-Файфер, бо она в дїлї русиньства є тверда як желїзо, а то нелем в области навчаня русиньского языка і літературы, але вообще цілого културно-народностного жывота Русинів/Лемків у Польску. А праві в тот день і она славила округлый юбілей, также, окрем ґратулацій, была єй передана величезна торта. Преркрасным дарунком нелем про ню, але і про вшыткых притомных быв богатый културный проґрам.