Священна сінода Православной церькви в Чехії і на Словакії з радостёв у медіях інформовала, же в недїлю, 31. мая 2009 року были на Словакію принесены святы мощі Александра Нєвского. Часть святых мощей і ікона святого як дар Руськой православной церькви были покладжены в Катедралнім храмі святого Александра Нєвского в Пряшові про духовну радость і пікріплїня православных вірників на Словакії.
Офіціалну делеґацію Руськой православной церькви репрезентовав Ёго Преосвященство Александер, єпіскоп дмітровскый, вікарь Московской єпархії. Членами делеґації были і представителї Фонду святого Всехвального апостола Андрія Первозванного з Москвы.
При тій нагодї ся одбыла архієрейська свята літурґія в Катедралнім храмі святого Александра Нєвского в Пряшові, а то од десятой годины. Святы мощі і велика процесійна ікона святого была вірникам одкрыта до другой годины пообіднёй, а пак были перенесены до Кошіць. В Кошіцях в новім розбудованім храмі (на уліцї Чехословацькой армады) о 16. годинї быв перед святыма остатками одслуженый акафіст к святому Александрови Нєвскому. По скінчіню богослужбы делеґація із святыма мощами одпутовала до Москвы.
Про православных вірників на Словакії є то велика духовна радость, затоже із святыма мощами пришов к нам святый, котрый своїм жывотом, покоров, терпезливостёв, щіров і великов службов своїй отчізнї і церькви є прикладом наслїдованя віры нелем про высокопоставленых людей, але і про каждого з нас. Святый Александер Нєвскый быв руськым князём, котрый своёв службов зъєдиняв вшыткы народы, што жыли в тогдышнїй Руси. Своёв жывов віров, жертовностёв Хрістовому Євангелію, доказав хранити Русь од насилства і духовного утиску чуджой надвлады. Вірив, же морално і духовно слободный чоловік в сполупраці з Хрістом переможе в бою з неправдов і насилством. Ёго служба є моралнов вызвов про каждого з нас, абы сьме зістали вірны Хрістовому Євангелію, нашли змірїня в духовній, културній і народній ідентітї і знали сполупрацовати при утриманю покоя у світї, при утриманю условій здорового духовного розвоя поєдных особ і общества. Святе православіє зъєдиняло многонародность тогдышнёй Руси. Такым способом мож было розумно одбити в тогдышнїй Руси неприятельскый утиск споза граніць. Ласков к ближнїм, приятелям і неприятелям, духовнов силов святый Александер Нєвскый доказав ословити неприятеля так, же хрістіаньска любов нераз отупила ёго остру шаблю. По ёго смерти ся утримали справы о ёго чудотворній силї при охоронї Руси.