15. мая 2010 была конечно уложена урна з попілём писателя Василя Зозуляка до родной чертіжняньской землї (перед тым была уложена в селї Леховіце на Мораві, де вмер), чім ся сповнила ёго воля, а то точно в день ёго смертї сперед 16-ёх років. Тот акт быв планованый на день сторічя од ёго народжіня – 19. септембра 2009 і з нагоды 15 років од ёго смерти, але то ся не подарило, бо тот акт быв споєный і з презентаціов книжкы о нім, яка але вышла аж на кінци 2009 року під назвов Світла і тінї Василя Зозуляка.
Святочный день у Чертіжнім, Міджілабірьского окресу, зачав панахідов при урнї у домі смутку, яку за помершым В. Зозуляком одправляли трёме русиньскых отців духовных – о. Франтїшек Крайняк із Камюнкы, о. Іґор Панчак із Воліцї і о. Іван Барна зо Светліць за притомности родины, знамых і віруючіх Чертіжнян. Потім процесія вшыткых притомных перенесла ся на цінтерь за церьквов, де урна была уложена до гробу, сполу з книжков о нім і двома книжками ёго дївкы, Маґдалены Лаврінцёвой. При гробі Василя Зозуляка, котрый є міджі гробами ёго родичів, Василя і Улї, чітало ся Лазарёве євангеліє і молила ся одпущательна молитва. Потім гріб быв посвяченый святов водов і запечатаный. Наконець ся співала Вічная память. Од цінтеря вшыткы першли до Ґрекокатолицькой церькви Вознесенія Ісуса Хріста, де была одправена Служба Божа за помершым.
Другов частёв того святочного дня была презентація двох книжок, де ся пише о Василёви Зозулякови і котры вышли в минулім роцї: 100 вызнамных Русинів очами сучасників, ІІ. часть і Світло і тїнї Василя Зозуляка. Ту ся акція зачала і скінчіла тыж молитвов, яку ся молив о. Франтїшек Краняк. Потім выступив сын писателя Василя Зозуляка – Александер, котрый подяковав вшыткым, якы ся заслыжыли в тім, же цілый день присвяченый В. Зозулякови, ся міг достойно зреалізовати (в тім чіслї і старостови села Александрови Куликови), підкреслив і то, же конечно ся му подарило сповнити довг нянькови, жебы ёго прах спочінув у родній землї і так ёго душа нашла конечно вічный покій. Потім выступили зо споминами на В. Зозуляка Маґдалена Лаврінцова, Павел Зозуляк і Миколай Пачута. В рамках той бісїды притомны в малій салї дому културы і сільского уряду посмаковали сі на домашнїх печеных перогах, маковых закручаниках і добрім винї. Наконець была автоґраміада зоставителя книжкы Світло і тїнї Василя Зозуляка – А. Зозуляка і авторкы двох властных книжок, М. Лаврінцовой, котра іде в писательскых слїдах свого нянька.
Цілый святочный суботній день у Чертіжнїм выйшов як выдарена пєтна акція і прояв одданя почливости знамому Чертіжнянови – Василёви Зозулякови.