18. децембра 2010 в ґрекокатолицькій церькви в Кежмарку одбыла ся акція Спішске Ріство. У двойгодиновім проґрамі выступили ґрекокатолицькый, римокатолицькый і євангелічный хоры. Віруючіх (міджі нима многы русиньскы ґрекокатолици) і гостїв привітав у церькви о. Петро Федор. Што нас тїшыть, же на тій акції співалы і Русинкы – сестры Углярёвы. Співы сестер у новій ґрекокатолицькій церькви потїшыли нелем нашых Русинів, але і каждого ту притомного. Їх колядкы і вінчованкы награвала і кежмарьска телевізія.
По скінчіню проґраму, на вечерї говорило ся о народных звычаях і їдлах, якы ся приправлёвали на рождественны свята. Мы не забыли і на то главне – припомянути Русинам, же ся ближыть 21. май 2011, кідь буде списованя людей і же нашым материньскым языком є русиньскый язык а народность русиньска. Кілько нас буде? Янко Баюс повів: – Кібы каждый Русин собі записав русиньскый материньскый язык і народность русиньску, то тілько нас буде, кілько нас Русинів на Словеньску жыє!