10. – 11. юла 2009 ґрекокатолицька парохія в Руськім Керстурї (Войводина), котрый ся поважує за центер Русинів у Сербії, одбыла ся стріча молодых ґрекокатоликів.
На нїй взяло участь высше стовкы людей, окрем домашнїх, і молоды з Коцура, Кулы і Нового Саду, дакотры пришли і з апостольского екзархату выходного обряду в Македонії. На тему стрічі Металность світа – менталность Євангелії выступили зо своїма рефератами отцї духовны Михал Малацко, Дарко Рац і Владіслав Варґа, а по по каждім із них розпрудила ся жыва діскузія. По першім дню в Руськім Керестурї молоды перешли до Водїцы, де їх навщівив і єпіскоп Ґеорґій Джуджар, котрый про них одслужыв Святу літурґію і мав проповідь. Як підкреслив владыка, цілём такых стріч є, абы ся молодеж спознавала, начерпала новы духовны зажыткы, котры принесе до своїх домашнїх парохій.
По минулорічній стрічі молодых у Македонії была тота сучасна далшым збогачінём 30-річной традіції такых духовных стріч ґрекокатолицькой молодежи.