Русиньска оброда на Словеньску (РОС) а єй Містна орґанізація у Свіднику зорґанізовали Сімпозій на честь народного будителя Русинів Александра Павловіча, котрый як ґрекокатолицькый священик провадив свою душпастырьску службу якраз на Маковицї. Зато в дакотрых жрідлах найдеме при ёго менї ай прозывку, котру му дав сам народ, міджі котрым жыв і творив – „Маковицькый соловей“. Сімпозій ся одбыв 29. октовбра 2013 в Піддукляньскій книжніцї у Свіднику, де выступили троє реферуючіх з такыма темами: Снага о захованя народной і духовной ідентіты Карпаторосів в творах А. Павловіча (Мґр. о. Петро Савчак, православный священик), Языково-културны і сполоченьскы навязности у дїятельстві А. Павловіча (доц. ПгДр. Анна Плїшкова, ПгД., бадатель і высокошкольскый педаґоґ), Лексіка А. Павловіча і сучасный русиньскый язык (ПгДр. Кветослава Копорова, ПгД., бадатель і высокошкольскый педаґоґ). Ку притомным ся приговорив ай председа Русиньской оброды на Словеньску Владимір Противняк, котрый вызвав Свідничан ку тому, абы ся голосили ку своїй ідентітї, але вели ку тому ай своє потомство посередництвом спознаваня історії і културы свого народа, а таксамо посередництвом материньского языка, котрый, на жаль, ся у Свіднику учіть лем дакілько школярїв, хоць потенціал є ту великый.

Добрым доповнїнём была выставка о історії і вызнамных історічных особностях, котру в місцю перебываня сімпозія, у свідницькій книжніцї припртавив Іван Чіжмарь.

З културным проґрамом выступило тріо Тропарь, а тыж школярї Юліяна Савчакова і Фредерік Михал Фецуш. Участници сімпозія не забыли положыти квіткы ку памятнику А. Павловіча. Такый почін пана Петра Фецуша як председы МО Русиньской оброды у Свіднику треба привіти бо окрем пєтного акту, споєного з културным проґрамом мала акція і едукачный а таксамо выховный характер. Вшыткы троє реферуючіх у своїх выступах ся заміряли окрем іншого на одказ А. Павловіча про сучасників – одказ, котрый нас завязує быти гордыма Русинами, утримовати і шырити свій материньскый язык, так як то робив у свій час „Маковицькый соловей“ – Александер Павловіч, котрый ай свої творы писав народным языком Русинів.