10. децебра 2009 ся нам дістало до рук шесте выданя престіжной публікації WHO IS WHO V SLOVENSKEJ REPUBLIKE (Хто є хто в СР), яка вышла того рокы у Швейцарії на 979 сторінках і де є 4 720 новых біоґрафій особностей в СР, як і список з приближно 15 390 менами в поперетнїх пятёх выданях. Міджі особностями Словакії суть і даякы Русины, міджі нима і директорка Інштітуту русиньского языка і културы Пряшівской універзіты в Пряшові – ПгДр. Анна Плїшкова, ПгД., родачка зо Снины, яка прожыла дїтьскы і молоды рокы у Пыхнях недалеко Снины. Окрем іншого, она є авторков першой дізертачной роботы о русиньскім языкы в русиньскім языку, котру обгаїла на Універзітї Коменьского в Братїславі. Є авторков і співавторков многых русиньскых кних і учебників, найновше єй выйшла в анґліцькім языку моноґрафія Language and National Identity: Rusyn South of Carpatians (Ню Йорк: Выдавательство Колумбійской універзіты, 230 стор.)