29. фебруар i 31. марeц 2012 – то суть конечны терміны на поданя приглашок на факулты Пряшівской універзіты, на котрых мож штудовати русиньскый язык і літературу в комбінації з іншыма предметами.
Занедовго тогорічны абсолвенты середнїх школ будуть собі давати приглашкы на высокошкольскы штудії, зато хочеме їх допереду поінформовати о актуалных можностях штудія русиньского языка на ПУ, причім комплексны інформації можуть здобыти на веб-сторінцї ПУ www.unipo.sk, респ. на сторінках окремых факулт ці Інштітуту русиньского языка і културы ПУ. Также в академічнім роцї 2012/2013 Пряшівска універзіта отварять в бакаларьскім ступню штудія слїдуючіх 17 комбінацій з русиньскым языком і літературов:

Філозофічна факулта (приглашкы приїмать до 29. фебруара 2012):
русиньскый язык і літ. – історія, естетічна выхова, етічна выхова, філозофія, анґліцькый язык і літ., французьскый язык і літ., нїмецькый язык і літ., російскый язык і літ., словацькый язык і літ., україньскый язык і літ., музичне уменя, вытварне уменя;

Факулта гуманітных і природных наук (приглашкы приїмать до 31. марца 2012): русиньскый язык і літ. – біолоґія, ґеоґрафія, педаґоґіка, математіка;

Факулта шпорту (приглашкы приїмать до 31. марца 2012): русиньскый язык і літ. – тїлесна выхова.

Віриме, же тоты інформації заінтересують тых, котры уважують о высокошкольскім штудію і про кого якраз русиністіка бы ся могла стати іншпіраціов до будучности.