10. aпріля 2010 Пряшів ся став свідком інтересной акції – стрітили ся ту народностны обчаньскы здружіня выходословеньского реґіону. Стрічу ініціовало Здружіня інтеліґенції Русинів Словеньска (ЗІРС) і далшы русиньскы актівісты, котры уж довшый час глядають способ як „зобудити“ северовыходный реґіон і не охабити го чім дале, тым веце падати до соціалного, а главно економічного маразму. Хыбить субєкт, котрый бы му з єдного боку поміг вырїшыти внутрішнї реґіоналны проблемы, а з другого боку понукнув бы добрый проґрам і про цїле Словеньско. Цілём нового субюкту НАШ КРАЙ, є ся зареґістровати на Міністерстві внутра СР і в першім рядї взяти участь у комуналных вольбах.