10. новембра 2010 у русиньскых Народных новинках ч. 44 – 45 / 2010 вышла статя під назвов Ці треба Русинам таку політічну партію як Наш край? Про єй актуалность ю публікуєме і в нашых інтернетовых новинках.

„Іщі ся ани не розбігла конкретна робота в дїлї заложіня і обдуманя екзістеції і роботы такой страны, а уж ся обявив ріґорозный протест проти нёй, докінця і обвинїня ініціаторів, же ся снажать сепаровати Русинів од Словаків, же Русинам не треба ниякой політічной страны, бо Русины, так як і Словаци, мають вшыткы політічны права зафіксованы в конштітуції Словацькой републікы. Не веце, не менше, подля Івана Бандуріча Русины просто не мають право участи на заложіню політічной страны, котра бы мала заставати за їх права, якы они дотеперь іщі не мають. Іде о права, якы дотеперь ся про них іщі не реалізовали в їх реалнім каждоденнім жывотї. Але Іван Бандуріч снагы ініціаторів заложыти таку страну поважує „за незмыселну гру“. Жебы придати належну вагу свому погляду, він ся підписав як „член Рады влады СР про пародностны меншыны“. Треба додати, же він є довгорічным членом той рады. Тота Рада Влады СР про народностны меншыны за довгы рокы ся не допрацовала к евідентным выслїдкам в области реалных прав про русиньску народность, то якый є хосен з такых членів рады як Іван Бандуріч? Він быв участником може і вшыткых засїдань той рады, але не памятам, жебы ся він даколи высловив о реалных потребах Русинів.

Іде наприклад о таке право, якым є навчаня дїтей в школах на базї русиньского материньского языка. А то ся прямо дотыкать дакількох тісяч русиньскых дїтей в селах Сниньского, Гуменьского, Міджілабірьского, Стропківского, Свідницького, Бардеёвского, Старолюбовняньского а счасти і далшых сусїднїх окресів. Русины творять векшыну жытельства в селах тых окресів. То значіть же Русины тых сел мають повне право домагати ся навчаня своїх дїтей на основі свого материньского языка. Выгваряти ся, же Русины мають дозволено учіти ся в школах і по русиньскы – є кламна аж фалошна антігра. І зато, бо родічів тых дїтей нихто николи не пересвідчовав, же школа з навчанём русиньского языка є цалком рівноправна зо школами з навчанём словацького языка. Тым не тверджу, же в тій области не суть і шпеціфічны проблемы.