Стало добров традіціов Основной школы з русиньскым языком навчаня в Чабинах орґанізовати в рамках Місяця книгы конкурз школярїв у декламованю русиньской поезії, так тому было 19. марца 2013.

У конкурзї взяло участь 14 школярїв, котры декламовали поезію Осифа Кудзея, Гелены Ґіцовой-Міцовчіновой і Іветы Мелничаковой, але найвеце сі выврало стишкы О. Кудзея, котрый быв тыж притомный на сутяжі і сам школярям задекламовав пару своїх римованых баёк. По вступій співацї вшыткых школярїв зачав самотный конкурз в декламації русиньской поезії, на котрім школярїв і гостї привітала директорка школы ПаедДр. Марія Ясикова, котра тыж привітала членів пороты конкурзу: директорку Інштітуту русиньского языка і културы Пряшівской універзіты доц. ПгДр. Анну Плїшкову, ПгД. (председнічка), учітеля і методіка русиньского языка з Основной школы М. Сопиры з Радванї над Лабірцём і директорку Матерьской школы в Чабинах із выховным языком русиньскым Любіца Ґайдошову. Они серёзно оцїнёвали каждый выступ і наконець выголосили выслїдкы – в І. катеґорії (учні 1. і 2. класы) 1. місце выграла Вероніка Ясикова, 2. Маріо Коссей а 3. Терезка Панчакова. В другій катеґорії (учнї 3. класы) став вітязом Марек Ясик, 2. Вероніка Панчакова, 3. Адам Фейко. Вшыткы были оцїнены великым аплавзом і треба їм подяковати за декламацію русиньского красного слова. Але почливость треба дати і остатным, котры не выграли, але взяли учать на конкурзї: Самуелови Коцанови, Давідови Смолеёви, Міріам Коссеёвій, Сарі Хрипаковій, Ребецї Ґалішіновій, Осифови Маґочови і Тамашови Панчакови. Може, в далшым (4. річнику конкурзу) будуть і дакотры з них успішны. Але і так найвекшов радостёв є, же спомянуты дві директоркы ОШ і МШ, як і учітелька ОШ Мґр. Моніка Сірікова, нелем дїтей участь по русиньскы, але ведуть їх к любви ку русиньскому красному писменству, приклады якого ту прозвучали. Дякуєме вам вшыткым за ваше діятельство. Добрым збогачінём конкурзу декламації русиньской поезії были і співанкы в інтерпретації школярїв і школкарїв, як і незабытный выступ О. Кудзея. Віриме, же 4. річник Чабиньского студника буде зась о крочком допереду, крочком к лїпшій якости.