18. новембра 2010 в ПКО Чорнім орлї в Пряшові одбыв ся юбілейный концерт дївы русиньского фолклорного неба – Марії Мачошковой, яку не треба шпеціално представлёвати, бо ю познать множество людей.
Єй голос звучав давно перед тым, як наступила на сцену плеяда далшых русиньскых народных співачок, дакус молодшых віком, а дозволиме сі конштатовати, же звучіть з єднаков силов доднесь. Марька Мачошкова є просто леґенда, котра перекрочіла нелем стороча, але і русиньскый, докінця і европскый контекст. На свій концерт, якый зорґанізовало Здружіня Русинів Словеньска, собі позвала і гостїв, як то бывать звыком, міджі котрыма доміновав єй співацькый камарат – Янко Амброз. Тот концерт потїшыв много людей і же Марька є все популарна і при своїй сімдесятцї (апропо, тоты рокы бы єй нихто не гадав), свідчів і факт, же єй концерт быв выпроданый уж пару днїв перед ёго реалізаціёв.