19. фебруара 2010 ославив Маестро, ведучій єдиного в даный час ансамлю Лемковина – Ярослав Трахановскый – своє сімдесятьрічя од дня народжіня, єден, сміло можеме назвати, із штирёх лемківскых/русиньскых сімболів у Польску попри Теодорови Ґочови, Павлови Стефанівскім і Петрови Трохановскім.
Народив ся в селї Білцарева, котре уж скорше дало світу неєдного вызначного Лемка. 1947 року ёго родиче з дїтми были выстягованы в рамках неславной Акції „Вісла“ на запад Польска. Уж кідь быв школярём у Пархові, потім у Чмелю малый Ярослав зачав грати на гуслях. Зато недивно, же родічі у 1955 роцї го послали до Музичной школы в Ліґніцї. По скінчіню штудій і воєньской службы зачінать думати заложыти лемківскый ансамбель, але было то тяжко, бо Лемкы были роспорошены по Лемковинї, тоты што ся ту вернули. Але наконець позберав членів ансамблю із сіл Лісика, Зимна Вода і Букувня і створив 30-членный ансамбель, котрый выступав на різных фестівалах і властных концертах. Потім у 1968 Я. Трохановскый вертать ся на родну Лемковину, де ходить по лемківскых/русиньскых селах (од Ганчовы по Зіндранову) і закладать малы ансамблї і глядать співаків і гудаків до великого лемківского ансамблю. Заложыв го і зачав вести ансамбель од 15. фебруара 1970 під назвов Лемковина.
Зробив великы културно-освітну роботу міджі Лемками, але главно в области музичной културы. Зато сі заслужыть высоке оцїнїня нелем вшыткых Лемків в Польску, але і остатных Русинів у світї. Ку ґратулантам ся придавають і члены нашой редакції Русин і Народны новинкы. На многая і благая лїт!