11. новембра 2011 на Інштітутї русиньского языка і културы Пряшівской універзіты (ІРЯК ПУ) в Пряшові ся одбыло перше засїданя узшого кругу – лінґвістів – Языковой комісії русиньского языка. Тот порадный орґан ІРЯК ПУ буде офіціално продовжовати свою екзістенцію і розвивати научну роботу з цїлём приїманя оптімалных рїшінь в процесї нормотворїня і розвоя русиньского списовного языка на Словеньску. Ёго екзістенція выплывать зо Статї 5, пункту 4 Штатуту ІРЯК ПУ з 2. марца 2010.
Подля штатуту, членів комісії на основі пропозіції веджіня інштітуту менує директор ІРЯК ПУ. Актуалне зложіня комісії але є выслїдком пропозіції участників засїданя шыршого кругу Языковой рады, орґанізованого 28. септембра 2007 бывшым Оддїлїнём русиньского языка і културы Інштітуту реґіоналных і народностных штудій ПУ в рамках научного семінаря Языкова култура і языкова норма в русиньскім языку. Дану пропозіцію, (яку в повній подобі мож найти на www.rusynacademy.sk/rusynski/rusyn_jazyk.html), веджіня ІРЯК ПУ акцептовало. З цїлём скликати перше засїданя узшого кругу, ІРЯК ПУ вызвав запропонованых лінґвістів потвердити своє членство в узшім кругу языковой комісії і участь на першім засїданю. На основі той вызвы на першім засїданю участь потвердили і взяли: доц. ПгДр. Василь Ябур, к. н., доц. ПгДр. Юрій Панько, к. н., ПгДр. Юрій Цігра, к. н., як і вшыткы научно-педаґоґічны робітнічкы секції языка ІРЯК ПУ – ПгДр. Марта Бенькова, ПгД., ПгДр. Кветослава Копорова і доц. ПгДр. Анна Плїшкова, ПгД.

Предметом першого засїданя было главно становлїня концепції, штруктуры і плану роботы узшого кругу языковой комісії. Споміджі многых проблемів у сучаснім списовнім русиньскім языку на Словеньску, котры лінґвісты настолили як темы на рїшаня будучіх засїдань, згодли ся в першім рядї на темах про найблизше засїданя. Зачати хотять самособов од алфавіту – ёго обсягу, кількости і порядку наслїдованя букв, причім настоленый быв тыж вопрос ёго компатібілности з другыма варіантами русиньского языка. Як найбівшый проблем быв означеный проблем термінолоґії, а то нелем лінґвістічной, к якій ся лінґвісты планують вернути і переоцїнити дакотры запропонованы терміны з року 1994 (поз. Панько, Юрій: Русиньско-русько-україньско-словеньско-польскый словник лінґвістічных термінів. Пряшов: Русиньска оброда, 1994), але тыж термінолоґії ґеоґрафічной і іншой, яка є сучастёв русиньской лексікы. Настоленый быв таксамо проблем чуджіх слов в русиньскім языку – фреквенції їх вжываня, правопису, але і родовой класіфікації, формотворїня і под.
Прияты рїшіня узшого кругу языковой комісії будуть наслїдно предкладаны на діскузію шыршому кругу языковой комісії, яка ся планує скликовати раз до рока. Узшый круг языковой комісії ся буде сходити подля потребы, мінімално але двараз до рока.