11. децембра 2011 у Домі културы у Свіднику Окресна орґанізація Русиньской оброды у Свіднику, котра є колектівным членом Словеньской асоціації русиньскых орґанізацій із центром у Пряшові, в інтересї захраны і розвоя материньского русиньского языка уж 19-ый раз зорґанізовала ославы народжіня Ісуса Хріста в русиньскім языку, ку чому того року приспіла і штатна дотація.
Главным орґанізатором концерту была спомянута наша Окресна орґанізація РОС у Свіднику в сполупраці з Піддукляньскым освітным центром і містом Свідник. Концерт Віфлеємскый вечур быв фінанчно підпореный Урядом влады СР посередництвом проґраму Култура народностных меншын 2011 і є єдиным русиньскым концертом того тіпу на Словеньску. Спонзорьскы на реалізацію проєкту приспіли: Петро Піліп і Інж. Михал Гомза, котрым щіро дякуєме. Дякуєме і вшыткым учітелям, котры і того року ся анґажовали у захранї і поужыванї нашого материньского русиньского языка, як і приправили выступлїня своїх школярїв у русиньскім языку. В концертї брало участь 172 выступаючіх (!) і ведучіх колектівів із умелецькой, матерьскых і основных школ міста Свідника, як і фоклорный колектів Маковічка з музичнов, співацьков і танечнов ґрупами. І тот рік у переповненій салї з веце як 300 позерателями лунали співанкы, вінчованя і колядкы в русиньскім языку. Тот успішный концерт богатов традіціёв і множеством публікы буде на будучій рік ославлёвать 20 років, і о рік зась укажеме путь уплатнїня русиньского языка в матерьскых і основных школах. Мы орґанізаторы придїляме тому велику увагу і уж в тім часї зачінаме помалы з приправов юбілейного річника той акції.
Хрістос раждаєть ся! Славиме Єго!