20. марца 2012 у класї єдной із двох основных школ із русиньскым языком навчаня в Чабинах (друга была недавно одкрыта у Баєрівцях із 10 школярями) одбыв ся другый річник конкурзу декламаторів – Чабиньскый студник, до котрого школяриків 1., 2. і 4. класы приготовили директорка і учітелька ПаедДр. Марія Ясикова і учітелька Мґр. Моніка Сірікова.

Конкурз пройшов у трёх катеґоріях, респ. подля высше уведженых класїв. Тяжко было выберати, бо вшыткы школярикы были добрї приправлены і красно декламовали, але все є дахто лїпшый і кус гіршый, также наконець были такы выслїдкы: І. катеґорія: 1. місце Вероніка Ясикова, 2. місце Ребека Ґалишинова і два 3. місця: сородинцї Міріам і Маріо Косеёвы. В ІІ. катеґорії 1. місце здобыла Вероніка Панчакова, 2. місце Марек Ясик, третє – Адам Фейко. В ІІІ. катеґорії учнів 4. класу были такы резултаты: 1. Діана Костілникова, 2. Радослава Ясикова і дві 3. місця: Зузана Сірикова і Яна Кускова. Вшыткым оцїненым і неоцїненым ґратулуєме і барз нас потїшило, як з уст тых найменшых звучало благородне русиньске поетічне слово. Найвеце декламаторїв собі выбрало облюбены байкы Осифа Кудзея з Няґова, потім віршикы про найменшых Гелены Ґіцовой-Міцовчіновой із Міджілаборець а двоє декламаторів по єднім віришику од Іветы Мелнічаковой із Міджілаборець і Миколая Коневала з Камюнкы. А же місця і з тым споєны цїны были роздїлены так, як были, то заслуга 3-членной пороты, у зложіню котрой были: доц. ПгДр. Анна Плїшкова (председкыня, директорка Інштітуту русиньского языка і културы Пряшівской універзіты в Праяшові), ПгД., Любіца Ґайдошова (директорка і учітелька Матерьской школы в Чабинах із выховным языком русиньскым, а така школка є покы-што єдина офіціална на Словеньску) і Мґр. Марек Ґай (методік русиньского языка Методічно-педаґоґічного центра в Пряшові і учітель русиньского языка і културы в ОШ Михала Сопыры у Радванї над Лабірцём). Треба за снажіня подяковати як вшыткым декламаторам, учітелькам, котры їх приправили на конкурз: М. Ясиковій і М.Сіриковій, так і членам пороты. Про мене, а нелем про мене, думам сі, наймилїшым было выступлїня тых найменшых із Матерьской школы в Чабинах – Терезії Панчаковой і Юлії Ґайдошовой, котрых приправила директорка МШ Л. Ґайдошова. Милым збогачінём было то, же декламація ся чередовала з русиньскыма співанками учнів ОШ, як і то, же послухати декламаторїв пришли і дакотры родічі, як і двоме русиньскы писателї: Г. Ґіцова-Міцовчінова і О. Кудзей, котрый наконець ся пригварив ку притомным і задекламовав їм дакілько баёк із найновшого ёго зборника під назвов (Ча)байка, котрый выдало Общество Йоана Крестителя. Быв то прекрасный день, котрый потїшыв нашы сердця, бо было чути русиньске слово красной літературы, были сьме свідками, же є про кого писати і выдавати книжкы по русиньскы і же ся тым занимають нашы русиньскы просвітителї. Дякуєме Вам за тот чудесный день!