1. децембра 2009 члены орґанізації молоды.Русины приправили красну акцію під назвов 2. стріча Русинів і їх приятелїв у Нїтрї, на якій не хыбовали, окрем доброй налады, музикы, співу і танцю, ани новы інформації про родаків із русиньскых сел далеко од їх домова. Зышли ся на ній главно штуденты двох нїтряньскых універзіт. Частёв стрічі была презентація філму Іншы світы і презентація роботы і актівностей орґанізації молоды.Русины. Главным цілём той акції было – дати довєдна в Нїтрї русиньску комуніту, котра бы, окрем стрічаня ся і презентованя русиньской народностной меншыны посередництвом різных акцій, вытваряла міджі собов узькы особны одношіня і жебы собі єй члены взаємно помагали.