25. марца 2010 ославили Русины Словакії 20-річа од заложіня першой їх културно-народностной орґанізації втогды у Чесько-Словеньскій федератівній републіцї, днесь у Словеньскій републіцї – Русиньской оброды (РО).
25. марца 1990 у Міджілабірцях одбыла ся закладательска громада Русиньской оброды (днесь Русиньской оброды на Словеньску). Єден із закладателїв і председів Русиньской оброды, Александер Франко заспоминав на час єй заложіня так: „Др. М. Турок-Гетеш быв директором Містьского културно-освітного центра в Міджілабірцях а там ся зачали сходити люде, котры ся найвеце подїляли на пізнїшім заложіню РО. Было їх велё, но спомяну холем дакілько мен, як: Е. Ґалишин, А. Владыкова, О. Ґрамата, М. Калиняк, М. Бицко, П. Фецура, В. Бородачова, М. Хахаляк, Л. Рогач, о. Ф. Крайняк, В. Варян, О. Гучко, Я. Бака, М. Харітун, А. Зозуляк, В. Ґмітерко, Ш. Бунґаніч, С. Сметанка, В. Ґошаній, І. Бандуріч, Ф. Віцо і многы іншы...“
Вдяка їм і остатным русиньскым актівістам, же взникла наша перша русиньска орґанізація, котра зограла вызнамну роль у русиньскім русї а єй робота слїдна міджі Русинами і днесь!