Пан Ян Калиняк не реаґовал на мою статю Ад: „О округлім столї Русинів Словеньска“. Не написав свою пропозіцію Проґраму Русинів. Прото я примушеный вернути ся к ёго статї „О округлім столї Русинів Словеньска“, і з той дедуковати ёго намірїня:

1) дві третьны ёго статї суть присвячены аґресівности проти Союзу Русинів-Українцїв Словеньской републікы, лежить му в жалудку вшытко україньске ...;
2) твердить же веджіня Русиньской оброды на Словеньску не знали, што дале, а зато є твердо забетоноване і стоїть на єднім місцї;
3) лежить му в жалудку, же у Свіднику і дале будуть Свята културы Русинів-Українцїв Словеньска;
4) пише: мы не маме штат, як не мають Ромове, і нам треба уповномоченого, жебы нас офіціальнї заступовав а репрезентовав.

Мій погляд:
Ад 1) Ёго аґресія проти братерьскым кіріломефодьскым Українцям, українізації (?), свідчіть о тім, же є сепаратіста. Но чом ёго сепаратізм, аґресівность не є намірена проти Словакам і словакізації ґрекокатолицькых і православных Русинів?
Ад 2) Статя пана Яна Калиняка, то же не написав свою пропозіцію Проґраму Русинів, же претендує на перше місце за члена округлого стола скоріше свідчіть о тім, же він ся хоче забетоновати і стоїть на єднім місцї. Де мож відїти выслїдкы ёго возродной практікы, котра бы му доволёвала твердити, же слово одборника є потрібнїше а мать векшу вагу ... , же председове обчаньскых здружінь не будуть тыма, хто знає, што є найправилнїше і наймудріше, а же в тій сітуації обчаньскы здружіня будуть (выходить так же: лем) єдныма з главных реалізаторів русиньскых актівіт.
Ад 3) Пан Ян Калиняк, думам же знате, же мы Русины маме найвецей мен на світі: Рус, Карпаторус, Угрорус, Рутен, Лемко, Русин, Руснак, Русняк, Українець ...Тоты мена нам давали влады держав, у котрых сьме жыли. Кідь крітізуєте українізачну політіку од доб В. І. Ленїна, так бы сьте сам не мав робити русинізачну політіку односно к Українцям. Мали бы сьте знати, же найвецей біды нам робить словакізація. Я думам, же назва Свята култури Русинів-Українцїв Словеньска є добра. Докінця єм того погляду, же Свята култури Русинів-Українцїв Словеньска бы могли быти і святамі іншых народів кіріломефодьской традіції (Русів, Сербів ...) . Не є проблем конференсьєрови повісти, котре обчаньске здружіня ансамбель, співак ... репрезентує.
Ад 4) Незнам, ці дієте з незнаня, або собі усвідомлюєте наслїдкы русиньского сепаратізму:
– сперать нам черьпати з братерьскых кіріломефодьскых култур;
– проґрамово нас напрямує лем на черьпаня із словацькой културы, цїлково на черьпаня лем зо жрідла Словеньскопй републікы;
– резултатом є рапідне прискорёваня словакізації.
Орьєнтація на културы, котры суть вірны кіріломефодьскій традіції, нам уможнить нелем черьпати з тых култур, но уможнила бы нам претендовати і на поміч (єдночасно і фінананчну) од штатів вірных кіріломефодьской традіції. Зато єм того погляду, же потім бы не была потреба ся порівнёвати з Циґанами, і Русины бы не мусили мати уповномоченого влады СР.
З того вшыткого мі выходить, же ваша крітіка є дештруктівна.