24. апріля 2010 одбыла ся святочна єпіскопска інтронізація Преосвященного владыкы Мілана (Шашіка) на чело Мукачовской єпархії у Хрестовоздвиженьскім катедралнім соборі в Ужгородї.
На початку Ёго Высокопреосвященство архієпіскоп Іван Юрковіч, Апостольскый нунціус на Українї, за притомности Ёго Высокопреосвященства архієпіскопа Ціріла Васіла, Секретаря Конґреґації про Выходны Церьквы з Ватікану, притомным прочітав Папску буллу (офіціалне писмо) о менованю нового мукачовского правлячого єпіскопа і святочно передав му архієрейске жезло. Нунціус выпровадив владыку Мілана на стародавный єпіскопскый трон, зробленый іщі высше 200 роками за часів владыкы Андрія Бачіньского. Потім представителї духовенства Мукачовськой єпархії, монашества і віруючі проявили свою почливость і узнали своє підпоряджіня (homagium) новому правлячому владыкови.
По обрядї інтронізації была одслужена Архієрейска Божественна Літурґія за участі 22 єпіскопів Вселенской Католицькой Церькви і скоро вшыткого духовенства Мукачовськой єпархії. Тота Свята Літурґія є верейным уведжінём до уряду єпіскопа, якый теперь рядить єпархією нелем в менї Апостольского престолу, значіть, як адміністратор, але од свого мена, як повноправный правлячій єпіскоп-ордінарь Мукачовской єпархії. По Службі Божій із проповідёв выступив Ёго Высокопреосвященство архієпіскоп Іван Юрковіч, в якій высоко оцїнив плодне пастирьске служіня Преосвященного владыкы Мілана і підкреслив велику роль єпархіалного єпіскопа у містній Церькви.
По Літурґії владыку Мілана в менї кардінала Леонарда Сандрі, Префекта Конґреґації про Выходны Церькви, привітав архієпіскоп Ціріл Васіл із Рима. Архієпіскоп Мєчіслав Мокшіцький, Львовскый митрополит латиньского обряду, привітав кир Мілана в менї Єпіскопату, духовенства і вірників Римокатолицької Церькви на Українї. Владыка Богдан Дзюрах із Києва привітав нового єпарху в менї Ёго Блаженства кардінала Любомира Гузара, Верховного архієпіскопа Києво-Галицького, і в менї цілой Україньской Ґрекокатолицької Церькви. В менї Реформатьской Церькви Закарпатя владыку Мілана привітав єпіскоп Шандор Зан-Фабіан. В менї Закарпатьской областной рады і ОДА владыку вітав п. Іван Качур, заступник головы ОДА. Свого владыку тыж вітали представителї монашества, молодеж і віруючі різного віку.
Того дня одбуло ся одкрытя меморіалной таблы владови Андріёви Бачіньскому на площі, котра названа на ёго почесть, а тыж посвячіня мансардного штоку єпіскопской резіденції.