21. октобра 2011 Mузей модернего уменя Енді Варгола в Міджілабірцях ославив 20 років своёй екзістенції. За тоты рокы ся выпрофіловав на музей цїлосвітового значіня. Доказав, же собі заслужыть шпеціалный статус і окрему підпору штату.

Прeстіжне оцїнїня
Закладатель музею, уж небогый брат Ендіго – Джон Варгола приспів немалов міров ку тому, же култове дїло до Міджілаборець дістали. Сынове небогого Джона до Міджілаборець зо США про робочі повинности не пришли. Перевзятём Великой цїны Енді Варгола родина повірила Любу Противнякову, членку Джоновой родины. Джон Варгола здобыв оцїнїня ін меморіам. На будові музею Енді Варгола святочно одкрыли памятну таблу Джонови Варголови.
Цїну Енді Варгола за встрічность і поміч музею при реконштрукції будовы і при здобываню збіркового фонду перевзяв і председа Пряшівского самостравного края Петро Худік.

Ясань: „Екзістенція музею є підложена.“
Вiктор Ясань, історік уменя і приятель Джона Варголы, повів, же і в сучасности приходять ку гробу родины Варголовых у Піттсбурґу люде, котры там кладуть квіты і охабляють свої одказы. „Toто саме, абы люде приходили, мож зробити і ту. Екзістенція того музею в Міджілабірцях є підложена, што было і підтверджено. Таліяне і Нїмцї ся просять, де суть Міджілабірцї. Знають уж, же Енді не быв Чех, але Русин, і же на кінцю Словеньска, в Миковій, ся народили ёго родічі,“ підкреслив Ясань. Подля Ясаня смертёв Джона Варголы бы ся не мав сперти творчій процес. „Пoтребуєме молоду ґенерацію історіків уменя, жебы знали представити візію на далшых 20 років діятельства музею. На форах містных і крайскых самосправ бы мали выступати компететны люде з великым надглядом і духом і тоту думку обгаёвати.“

Світ здобывать і теперь
Єднов із причін, чом є екзістенція музею у Міджілабірцях підложена, я подля Ясаня то, же хоць Енді мать корїня в тім краю, доказав здобыти нелем Америку, але цїлый світ і здобывать го і дале. „Іщі все маме што робити, абы сьме ся дістали до Піттсбурґу і жебы ся дістав Піттсбурґ ту“, повів на марґо візії будучности музею. Высвітлив, же в музею Варгола в Піттсбурґу окремо му хыбують інформації о музею в Міджілабірцях і документ, котрый бы то презентовав.

ПСК музея ся не вздасть
Ясань з Худіком мали єднакый погляд, а то, же музей у Міджілабірцях перекрочів граніцї реґіону, мать цїлосвітове значіня і доказав, же му належыть окремый статус. Росходять ся але в поглядї на будучу справу музею. Покы Ясань собі знать представити тот музей як высунуту експозіцію Народной ґалерії в Братїславі, Худік ніт. „Покы было справцём міністерство културы, не купило ани єден твір Е. Варгола до збіркового фонду музею у Міджілабірцях. Кідь ся музей дістав під справу Пряшівского самосправного края, од року 2002 дав до порядку маєтковы односины, жебы тоту часть будовы дістав до властництва і міг до нёй інвестовати. В роцї 2009 сьме інвестовали 286 тісяч евр до комплексной оправы стріхы музею. Інвестовали сьме ай до збіркового фонду, “ підкреслив П. Худік. Додав, же музей мать таке значіня, жебы стояло за то, абы му придїляв шпеціалну увагу і штат. Но не змінов справцю, але фінанчнов підпоров музею Пряшівскому самосправному краю.