Од 12. юна до 3. юла 2011 буде на Пряшівскій універзітї в Пряшові проходити 2. Міджінародна лїтня школа русиньского языка і културы під назвов Studium Carpato-Ruthenorum 2011.
Пряшівска універзіта в Пряшові є єдинов універзітов у Словацькій републіцї, котра реалізує навчаня акредітованого штудійного проґраму русиньскый язык і література, ґестором котрого є Інштітут русиньского языка і културы. Вдяка ёго 3-тыжденному едукачному проєкту Studium Carpato-Ruthenorum – Міджінародна лїтня школа русиньского языка і културы Пряшівска універзіта є сучасно єдинов універзітов на світї, котра зареаґовала на інтерес o таку форму навчаня русиньского языка з боку домашнїх і загранічных адептів і в сучасности рихтує другый річник того міджінародного проєкту. Міджінародна лїтня школа русиньского языка і културы є про:
– каждого, хто ся хоче учіти русиньскый язык і спознати історію і културу карпатьскых Русинів,
– штудентів середнїх і высокых школ,
– особы над 18 років.
Цїлём проєкту є здобыти або росшырити языковы компетенції в русиньскім списовнім языку і проглубити знаня з области карпаторусиньской історії і културы.