Пряшівска універзіта в Пряшові є єдинов універзітов у Словацькій републіцї, котра реалізує навчаня акредітованого бакаларьского і маґістерьского штудійного проґраму русиньскый язык і література, ґестором котрого є Інштітут русиньского языка і културы. Вдяка ёго 3-тыжденному едукачному проєкту Studium Carpato-Ruthenorum – Міджінародна лїтня школа русиньского языка і културы Пряшівска універзіта є сучасно єдинов універзітов на світї, котра зареаґовала на інтерес o таку форму навчаня русиньского языка з боку домашнїх і загранічных адептів і в сучасности рихтує четвертый річник того міджінародного проєкту.

Міджінародна лїтня школа русиньского языка і културы є про:
– каждого, хто ся хоче учіти русиньскый язык і спознати історію і културу карпатьскых Русинів,
– штудентів середнїх і высокых школ,
– особы над 18 років.
Цїлём проєкту є здобыти або росшырити языковы компетенції в русиньскім літературнім языку і проглубити знаня з области карпаторусиньской історії, културы, літературы, етноґрафії.

Педаґоґічный процес

Педаґоґічный процес на лїтнїй школї проходить в просторах Пряшівской універзіты, ул. 17. новембра ч. 15. Навчаня ведуть высокошкольскы професоры, фундованы славісты і шпеціалісты в области карпаторусиністікы зо Словакії, Україны, Польщі, США і Канады. Педаґоґічный процес творить інтензівный курз русиньского языка (уровнї А, Б, Ц) і історії карпатьскых Русинів, котрый на тім річнику буде росшыреный о історію русиньской літературы і културы і о мінікурз етноґрафії карпатьскых Русинів окрем анґліцького і в русиньскім языку. В цїлім педаґоґічный процес обсягує:
– 20 годин русиньской історії в анґліцькім і русиньскім языку (враховано історії русиньской літературы і културы), т. є. 2 годины каждый день, од 09.00 дo 11.00 год.
– 30 годин русиньского языка в анґліцькім і русиньскім языку, т. є. 2 годины каждый день, од 13.00 дo 15.00 год. (теорія і конверзація),
– 10 годин етноґрафії Русинів в анґліцькім і русиньскім языку (подля приложеного проґраму),
– годины конверзації в неформалных просторах, ґрупах і сітуаціях, т. є. мімо універзітных клас (подля приложеного проґраму).
Абсолвенты здобудуть Цертіфікат о абсолвованю Studium Carpato-Ruthenorum 2013.

Курз історії карпатьскых Русинів

Лекторы: Проф. Др. Павел Роберт Маґочій, Торонтьска універзіта, Канада, Мґр. Валерій Падяк, к. н., Выскумный центер карпатістікы в Ужгородї, Україна. Курз є заміряный на історію Карпатьской Руси і карпатьскых Русинів од найстаршых часів аж по сучасность. Буде росшыреный о лекції з історії русиньской літературы і културы. Курз русиньского языка Лекторы: Доц. ПгДр. Анна Плїшкова, ПгД., Пряшівска універзіта, Словакія, ПгДр. Кветослава Копорова, ПгД., Пряшівска універзіта, Словакія, Мґр. Галина Малецка, Ліцей Марціна Кромера в Ґорлицях, Польща. Курз є заміряный на здобытя і росшырїня языковых компетенцій в русиньскім літературнім языку. Має теоретічну і практічну часть. Теоретічна часть є заміряна на здобытя знань з области сістемной штруктуры русиньского языка. Цїлём практічной части є навчіти ся бісїдовати по русиньскы і писати. Курз буде росшыреный о годины конверзації в неформалных просторах, ґрупах і сітуаціях, т. є. мімо універзітных клас.

Мінікурз русиньской етноґрафії

Лекторы: Асоц. проф. Др. Патріція А. Крафчік, Евырґріньска штатна універзіта, Олімпія, США, Проф. ПгДр. Микола Мушинка, к. н., екстерный сполупрацовник Інштітуту русиньского языка і културы Пряшівской універзіты, Словакія. Мінікурз є заміряный на дакотры области етноґрафії карпатьскых Русинів: народны співанкы, музику, звыкы, традіції...

Супроводны акції

Інтеґралнов частёв лїтнёй школы є супроводный проґрам, котрый ся реалізує все в пообіднїх годинах і через вікенды. Є заміряный на:
– презентацію русиньскых традіцій, фолклору і културно-сполоченьского жывота Русинів на Словеньску (фолклорный фестівал у Свіднику і русиньскы културны інштітуції в Пряшові),
– презентацію русиньской народной архітектуры і културы, културно-історічных памяток (музеї, сканзены, деревяны храмы),
– вечур русиньской літературы споєный з передаванём каждорічной Премії Александра Духновіча за літературу,
– выступлїня театру і філмовы вечоры,
– творивы дїлнї (крашіня яєць, спів),
– екскурзії по Пряшові і ёго околіцї і до реґіонів северовыходной Словакії, де жыють Русины.

Уквартелёваня і стравованя

Участници лїтнёй школы будуть уквартелёваны в штандардных двойпостілёвых ізбах з припоїнём на інтернет высокошкольского інтернату на ул. 17. новембра ч. 11 в Пряшові, недалеко высокошкольского ареалу. Стравовати ся будуть в їдални высокошкольского інтернату на ул. 17. новембра ч. 13. Штуденты будуть мати к діспозіції сполочну інтернатну кухню з леднічков і прачков. Недалеко высокошкольского ареалу ся находять обходы з потравинами, дроґеріов, рештавранты, інтернетовы кавярнї, книжковы обходы, кіоскы, апатыка, заставка автобуса.