Посылам другу (комплексну) припомінку (пропозіції) к выготовлїню Проґрамовых тез розвитку русиньского народа.

Преамбула:
Выходячі із вкладу св. братів Кіріла і Мефодія к формованю духовной і културной дїдовизны Европы, преамбулы Уставы Словацькой републікы і традічной неустанной орьєнтації Русинів на сохранїня і розвиваня заповіту св. братів Кіріла і Мефодія, котрый є основов ідентіты Русинів, выголосуєме, же будеме вшыткым своїм дїяльством підпоровати возобродый рух русиньского народа, ставленый на духовности і културї кіріломефодьской традіції.

Cтратеґічны задачі:
1. Сохранити заповіт св. братів Кіріла і Мефодія т. є.:
a) візантьску руську віру;
b) візантьску руську културу;
c) кіріліцю ...

2. Обновити наше споїня з выходнов жрідловов културов, т. є.:
a) доповнити дефіціт черпаня із выходной жрідловой културы;
b) обновити і дале укрїпляти і росшырёвати нашы духовны і културны контакты з выходнославяньскыма народами дотримуючіма чістый непорушены кіріломефодьскый заповіт.

3. Зъєдинїня:
a) зъєдинїня Русинів Словеньска;
b) зъєдининя выходных Славян жыючіх на Словеньску
- вытворїня політічной партії;
- вытворїня общоруського центра;

4. Наш лідер:
не будеме ся орьєнтовати на лідра в смыслї (єдного) штату.

Ad 1.
a) Історія нас учіть, же ґрекокатолицькы Русины ся легко латинізують на Словаків. Зато православны Русины суть нашым золотым фондом. Наше одношіня к православній, ґрекокатолицькій церькви, різным інштітуціям ся буде одвивати од того, як нам спомянуты інштітуції будуть напомічны при реалізації цїлїв русиньского руху;
b) будеме многосторонно напомічны тому, же бы фамілія, школа, церьков могли сповнити свою задачу при навчаню:
– родного русиньского языка, комунікації в русиньскій бісїдї, церьковно-русскім языку;
– заповіту св. братів Кіріла і Мефодія (фундаментів візантьскій руській віры, кіріломефодьской історії, културы ...). Кідь бы то было треба, будеме тому напомічны і посередництвом актівістів (можливость навчіти нашы дїти холем азбуку ...);
c) там де бы ся то вказовало як ефектівне, створиме на основі договору родічів «кіріломефодьскы класы» про дїтей выходных Славян, так і дїтей родічів іншых народів, проявляючих інтерес о навчаня своїх дїтей заповіту св. братів Кіріла і Мефодія (кіріліцю, візантьску руську духовность, културу, історію і под.); d) як публічно выголосив председа влады СР пан Роберт Фіцо – Словеньску републіку собі сотворили Словаци про себе. Потім мы Русины закля жыєме в тым штатї, і хочеме зістати Русинами, мали бы сьме ся снажыти быти максімално незавіслы од штату. Таку релатівну незавіслость од штату можемо здобыти лем пріватным подниканём. Зато будеме ся намагати створили за помочі успішных русиньскых бізнісменів Русиньску школу подниканя.

Ad 2.
a) Накілько довгодобо жыєме одорваны од выходной, візантьской хрістіаньской жрідловой културы, в околіцї непідпоруючой духовность і културу кіріломефодьской традіції є про нас жывотно важне обновити тото напоїня, доповнити дефіціт черпаня із выходной жрідловой културы і многосторонно розвивати нашы котакты з выходнославяньскыма народами. К тому будеме:
– укрїпляти нашы котакты з Православнов церьквов на Закарпатю, у Сербії ...;
– укрїпляти нашы котакты з працовниками в сферї школства і културы на Закарпатю, у Сербії ...;
– укрїпляти і розвивати нашы бізніс контакты.

Ad 3.
a) Ушыєме і высвятиме кіріломефодьску заставу – тот сімбол заповіту св. братів Кіріла і Мефодія, жебы сьме ся під ним были годны зъєдинити;
b) в політічній сферї ново сформуєме уж екзістуючу партію Наш край як кіріломефодьску партію, або створиме нову кіріломефодьску партію;
c) всерусскый центер затля не маме, но історія нас учіть, жебы сьме го мали мати. Зробиме вшытко про то, абы ся так стало. Резіденціёв того центра буде „Русский дом“ в Пряшеві.

Ad 4.
Будеме ся орьєнтовати на захованя і розвитя кіріломефодьской традіції, то є:
– будеме розвивати і укріпляти взаємно выгодну сполупрацу предностно з державами кіріломефодьской традіції;
– розвивати і укрїпляти взаємно выгодну сполупрацу будеме і зо вшыткыма державами, інштітуціями, котры акцептують нашу орьєнтацію, припадно ю і підпорують.

Позначкы:
1/ к розвинутю і реалізації высше спомянутых стратеґічных задач нашых проґрамовых тез можно доповнити таке множество конкретных задач, котре буде выходжати:
А/ з нашых можливостей і сил:
a) доданых штатом (дотачна політіка штату, чінна леґіслатіва штату, включно самосправы ...);
б) властных можливостей (русиньскы спонзоры, русиньскы актівісты, сполупраца в рамках народностных меншын вірных заповіту св. братів Кіріла і Мефодія...);
Б/ із нашых пріоріт становленых:
а) значінём єднотливых областей (акцій) про выратованя і розвиток русиньского народа;
б/ потрібностю становлїня высоты інвестіцій до єднотливых областей (акцій) про выратованя і розвиток русиньского народа.
2/ маркантна часть Русинів інклінує к вікінґовскій – латиньскій – западній орьєнтації. Тота орьєнтація ту є уж од зрады княза Святоплука І. року (874). Тота дорога є уж пройдена і знаме де веде. Внаслїідок зрады і пройденой пути взникли і дале ся з радов Русинів доповнюють Словаки. Прото мій погляд є такый, же надале:
«перед русиньскым рухом суть дві дорогы:
1) або ся єднозначно приголосити і будеме поступати по пути розвоя непорушеного заповіту св. братів Кирила і Мефодія, і так ся захраниме як русиньскый народ;
2) в другім припадї ся з нас стануть люде з є дным із словацькых наріч.» посмоть мою припомінку: http://www.holosy.sk/sk/okruhly-stol-rusinov-slovenska-poveril-vedenim-platformy-alexandra-dulebu
3/ дакотры Русини, з котрыма єм бісїдовав, суть того поглялу, же є барз важне, абы ся за помочі масово-комунікачных средств (СМІ) люде ся дізнали ся хто є досправды наслїдователём кіріломефодьского заповіту. Бізовнї є то барз важне, но думам собі, же іщі важнїше є, досправжне наповнёваня кіріломефодьского заповіту в жывотї Русинів. Прото нам треба мати закотвеный заповіт св. братів Кіріла і Мефодія в нашім проґрамі.

Звязаны статї:
– Без русофільства русиньскый рух загыне !
http://www.holosy.sk/m%D1%96lan-semanch%D1%96k-0
– К: Ідеї на рїшіня сітуації в русиньскім русї на Словакії 2 http://www.holosy.sk/ad-namety-na-riesenie-situacie-v-rusinskom-hnuti-na-slovensku-2
– Реакції на сучасный рух Русинів, посмоть: http://www.rusynacademy.sk/cms/-1053;-1086;-1074;-1080;-1085;-1082;-1099;-%E2%80%A2-noviny-%E2%80%A2-news-7-2013,1306.html