Порота Реґіоналной орґанізації Словеньского сіндікату новинарїв у Кошіцях, Літературного фонду – секції про журналістіку і новинарьску фотоґрафію в Братїславі в рамках 14. річника авторьского змаганя 19. юна 2009 оцінила новинарїв выходословеньского реґіону за 2008 рік. Выберала споміджі 53 авторів, 120 робот і фотоґрафій.

Приємно конштатовати, же в катеґорії Д1 (телевізії цілорепублікового характеру) 2. місто дістали авторы: Ярослава Саболова Сисакова, Ладїслав Чікі, Валерія Фірьєшова і Петро Крайняк, мол. за Народностный русиньскый маґазін , якый быв высыланый 14. октобра 2008. В нїм были представлены Русины з реґіону, якы жыють в красній сімбіозї з іншыма народностями, указали ся ту люде розлічных професій (доктор, учітель, ремеселник і ін.), якы у своїм сердцї носять ласку к свому родному, русиньскому. К дотворїню комплексного образу уведженого маґазіну значно припомогла камера, як і добросердечне і пересвічуюче слово модераторів і творцїв цілой релації.

Ґратулуєме!