11. – 12. септембра 2010 в селї Іновецї были великы ославы 3. річника св. Максима Сандовіча-Ґорліцького і 455. юбілею першой письмовой справы о селї. Далеке а, може, про дакотрых забыте село Іновцї, котре ся находить близько штатных граніць з Українов в окресї Собранцї, де жыють Русины, котрым не є легковажна русиньска култура і традії, якы з гордостёв утримують.
Головным орґанізатором акції была Православна парохія в Іновцях на челї з одданым дїлу отцём духовным Павлом Новаком, котрый ку святочному проґраму написав сценарь і сам славности конферовав, а зо своёв женов Мґр. Янов Новаковов і вшытко режіровав. На двойднёвій акції вшытко ся несло в русиньскім дусї і условіём про выступаючіх быв проґрам, заміряный на русиньску културу і традіції. Того року в проґрамі выступаючі представили пасьмо автентічной русиньской свадьбы.
На другый день міджі выступаючіма была і русиньска „Діва“ – співачка Марія Мачошкова у допроводї гры на акордеон Мілана Ґарберы, співацька ґрупа Пайташе, СҐ Лелія, сестры Угляровы з далекых Жаковець, Присташы з Іновець. Єдным словом, были то выдарены славности.