Новинкы • Noviny • News 39/2010

• Уж є в русиньскім небі

  25. септебра 2010 старостлива мати, публіцістка, писателька, за Словеньска перша лавреатка Премії Александра Духновіча за русиньску літературу од Карпато-русиньского выскумного центра в Ґласспортї (США) і наша довгорічна колеґыня – ПгДр. Марія МАЛЬЦОВСКА з Пряшова нас вшыткых охабила „Під русиньскым небом“ (так назвала єден із своїх романів) по тыжкій хворобі і вшыткы сьме ю одпревадили на послїднїй пути 28. септембра у єй роднім Руськім Потоцї, з котрым цїлый свій, многды нелегкый, жывот была „звязана пупочнов шнуров“. Там ся чула найлїпше, там ся ходила надыхать свіжого воздуху, вычістити собі голову.

• В Іновцях лем по русиньскы!

  11. – 12. септембра 2010 в селї Іновецї были великы ославы 3. річника св. Максима Сандовіча-Ґорліцького і 455. юбілею першой письмовой справы о селї. Далеке а, може, про дакотрых забыте село Іновцї, котре ся находить близько штатных граніць з Українов в окресї Собранцї, де жыють Русины, котрым не є легковажна русиньска култура і традії, якы з гордостёв утримують.

• 10 років Културного общества Русинів

  4. септембра 2010 ся одбыла святочна академія, котра была в містї Дева і была завершінём святкованя 10 років од заложіня Културного общества Русинів Румунії зa участи многых вызнамных гостїв, як наприклад Екштайн Ковач Петер, секретарь презідента Румуньской републікы або Дежі Аттіла, председа жупы Мараморошской области, але і членів Світовой рады Русинів: Дюру Папуґу (председа) зo Сербії, Владиміра Противняка зo Словакії або Николы Бобинця з Україны.

• Новы русиньскы учебникы

  На кінци лїтнїх канікул редакція Русин і Народны новинкы выдала штири красны учебникы про русиньскых школярїв, а то про 6. класу основных школ із навчалным языком русиньскым і з навчанём русиньского языка.